.jpg)
തിരുവനന്തപുരം: കാണാതായ വിദേശവനിത ലിഗയുടെ മൃതദേഹം കണ്ടെടുത്ത പ്രദേശം സംബന്ധിച്ച് ദുരൂഹത തുടരുന്നു. സ്ഥലത്തു നിന്ന് കണ്ടെത്തിയ രണ്ടു ഫൈബര് ബോട്ടുകള് പോലീസ് കസ്റ്റഡിയിലെടുത്തു. ലിഗയെ പനത്തുറയില് എത്തിച്ചത് ഇതിലൊരു ബോട്ടിലാണെന്ന സൂചനയെ തുടര്ന്നാണ് അന്വേഷണം.
പനത്തുറയിലെ കണ്ടല്ക്കാടുകള്ക്കിടയില് കത്തിക്കരിഞ്ഞ സ്ഥലങ്ങള് നാലിലധികം ഭാഗങ്ങളിലായി ചാരം കണ്ടെത്തിയിട്ടുണ്ട്. സംഭവത്തില് തെളിവു നശിപ്പിക്കാനുള്ള ശ്രമങ്ങളാണോ ഇതെന്നാണ് പോലീസ് സംശയിക്കുന്നത്. പല സ്ഥലങ്ങളിലായി ചീട്ടുകെട്ടുകളും, മെഴുകുതിരികളും കണ്ടെടുത്തു. ലിഗയുടെ മൃതദേഹം കണ്ടെത്തിയ സ്ഥലത്തു രണ്ടു ദിവസത്തിലൊരിക്കലെങ്കിലും ആളുകളെത്താറുണ്ടെന്ന് പോലീസിന് വിവരം ലഭിച്ചിട്ടുണ്ട്.
അതിനാല് തന്നെ മൃതദേഹം ഒരു മാസമായി ആരും കണ്ടിട്ടില്ലാ എന്നത് വിശ്വാസയോഗ്യമല്ല. നിരവധി നടപ്പാതകള് കടന്നുപോകുന്ന ഈ പ്രദേശത്തുകൂടി സ്ഥിരമായി ആളുകള് നടക്കാറുണ്ട്. ലഹരി മരുന്ന് സംഘങ്ങള് അവിടെയെത്തിയിരുന്നുവെന്നും നിര്ണായക മൊഴി ലഭിച്ചിട്ടുണ്ട്.
