ഭുവനേശ്വര്: ഭര്ത്താവിനും കുഞ്ഞിനുമൊപ്പം ബന്ധുവീട്ടിലേക്ക് പോയ യുവതി വഴിയില് ഇടയ്ക്ക് ഇറങ്ങിയത് വരുത്തി വച്ചത് വലിയ ദുരന്തം. ഭാര്യ തിരിച്ചുകാറില് കയറിയെന്ന് കരുതി കാര് ഓടിച്ചുപോയ ഭര്ത്താവ് 17 കിലോമീറ്റര് പിന്നിട്ട ശേഷമാണ് ഭാര്യ കാറിലില്ലെന്ന് തിരിച്ചറിഞ്ഞത്. അതോടെ യാത്ര ചെയ്ത ദുരമത്രേയും പല തവണ ഭാര്യയെ തിരഞ്ഞു കാറോടിച്ചുവെങ്കിലും കണ്ടെത്താനായില്ല. മൂന്നാം നാള് ഒരു ബന്ധുവീട്ടില് നിന്നും അവളെ തിരിച്ചുകിട്ടുമ്പോള് കൂട്ടമാനഭംഗത്തിനിരയായി ഏറെ അവശ നിലയിലായിരുന്നു.
ഒഡീഷയിലെ സാംബള്പുരിലാണ് സംഭവം. വ്യാഴാഴ്ച രാത്രി അങ്കുള് ജില്ലയില് നിന്നും കുടുംബ സമേതം യാത്ര തിരിച്ച യുവതി യാത്ര്ക്കിടെ പ്രാഥമിക കൃത്യത്തിനായി വഴിയരുകില് കാര് നിര്ത്തിയിറങ്ങി. ഭര്ത്താവും മകളും മുന് സീറ്റിലും ഭാര്യ പിന്സീറ്റിലുമായിരുന്നു ഇരുന്നത്. ഇടയ്ക്ക് പുറത്തിറങ്ങിയ യുവതി വെള്ളമെടുക്കാനായി പിന്ഡോര് തുറന്ന് അടച്ചിരുന്നു. ഡോര് അടയുന്ന ശബ്ദം കേട്ട് ഭാര്യ കാറില് കയറിയതാണെന്ന് തെറ്റിദ്ധരിച്ച് ഭര്ത്താവ് കാര് ഓടിച്ചുപോയി. 17 കിലോമീറ്റര് പിന്നിട്ടപ്പോള് മകള്ക്ക് ചോക്ലേറ്റ് വാങ്ങാന് പുറത്തിറങ്ങി തിരിച്ചുവരുമ്പോള് ഭാര്യയെ കണ്ടില്ല. എന്നാല് ഭാര്യയും എന്തെങ്കിലും വാങ്ങാന് പോയതാണെന്ന് കരുതി ഏറെ നേരം കാത്തിരുന്നു. കാണാതെ വന്നതോടെ കടകളില് മുഴുവന് അന്വേഷിച്ചു.
ഇതോടെ ഭാര്യ കാറില് കയറിയില്ലെന്ന് തിരിച്ചറിഞ്ഞ ഭര്ത്താവ് അവര് സഞ്ചരിച്ച എന്.എച്ച് 55ലൂടെ പല തവണ പരിശോധന നടത്തി. എന്നാല് ഭാര്യയെ കണ്ടെത്താനായില്ല. ഇതോടെ ഹഡപ്പ പോലീസ് സ്റ്റേഷനിലും ഇയാള് പരാതി നല്കി. ഈ സമയം കാറില് കയറാന് പറ്റാതെ റോഡിയൂടെ നടന്ന ഭാര്യ അതുവഴി വന്ന ഒരു ഓട്ടോയില് കയറുകയായിരുന്നു. ഓട്ടോയില് ഉണ്ടായിരുന്ന ആറു പേര് ചേര്ന്ന് ഇവരെ തട്ടിക്കൊണ്ടുപോകുകയും കൂട്ടമാനഭംഗത്തിനു ശേഷം ഉപേക്ഷിച്ച് കടന്നുകളയുകയും ചെയ്തു.
മൂന്നു ദിവസം ആയിട്ടും ഭാര്യയെ കുറിച്ച് വിവരം ലഭിക്കാതെ വന്നതോടെ മരണപ്പെട്ടിരിക്കാമെന്ന നിഗമനത്തില് കുടുംബം എത്തുകയും ചെയ്തു. ഇതിനിടെയാണ് ഞായറാഴ്ച പുലര്ച്ചെ ജഗത്സിംഗ്പുരിലെ ഒരു ബന്ധുവീട്ടില് നിന്നും യുവതിയെ കണ്ടെത്തിയത്. അവര് എങ്ങനെയാണ് അവിടെ എത്തിയതെന്ന് പോലീസിനോ ബന്ധുക്കള്ക്കോ വിവരമില്ല. യുവതി നല്കിയ വിവരങ്ങളുടെ അടിസ്ഥാനത്തില് അവരെ പീഡിപ്പിച്ച സംഘത്തിലെ നാലു പേരെ പോലീസ് കസ്റ്റഡിയില് എടുത്തു.
