ശ്രീനഗര്: 2016ല് കശ്മീരില് സൈന്യം വധിച്ച ഹിസ്ബുള് കമാന്ഡര് ബുര്ഹാന് വാനിയുടെ അടുത്ത അനുയായികളില് ഒരാളൊഴികെ എല്ലാവരേയും സൈന്യം വധിച്ചു. തന്റെ ഏറ്റവും അടുത്ത അനുയായികള്ക്കൊപ്പമുള്ള വാനിയുടെ ഗ്രൂപ്പ് ഫോട്ടോയില് ഇനി അവശേഷിക്കുന്നത് ഒരാള് മാത്രം. സദ്ദാം പദ്ദര് എന്ന തീവ്രവാദിയാണ് ഏറ്റവുമൊടുവില് കൊല്ലപ്പെട്ടത്. കശ്മീരില് ഞായറാഴ്ചയുണ്ടായ സംഘര്ഷത്തിലാണ് ഇയാള് കൊല്ലപ്പെട്ടത്.
താരിഖ് പണ്ഡിറ്റ് എന്നയാള് മാത്രമാണ് ഈ ചിത്രത്തില് ഇനി അവശേഷിക്കുന്നത്. ഇയാള് 2016ല് തീവ്രവാദം ഉപേക്ഷിച്ച് കീഴടങ്ങിയിരുന്നു. 2015ലാണ് വാനി സംഘത്തിന്റെ ചിത്രം സാമൂഹ്യ മാധ്യമങ്ങളില് വൈറലായത്. മുന് കാലങ്ങളില് കശ്മീരില് നിന്ന് തീവ്രവാദ സംഘടനകളില് ചേര്ന്നിരുന്നവര് മുഖം പോലും പുറത്ത് കാണിക്കാന് ഭയപ്പെട്ടിരുന്നു. എന്നാല് വാനി സംഘം മുഖം പോലും മറയ്ക്കാതെ ഫോട്ടോയ്ക്ക് പോസ് ചെയ്തതും അത് സോഷ്യല് മീഡിയയിലൂടെ പുറത്തുവിട്ടതും വന് ചര്ച്ചയായിരുന്നു.
ബര്ഹന് വാനിയായിരുന്നു ഇവരുടെ സംഘത്തലവന്. 22കാരനായിരുന്ന വാനിയെ 2016 ജൂലൈ എട്ടിനാണ് സൈന്യം വധിച്ചത്. സദ്ദാം പദ്ദാര്, ആദില് ഖന്ഡേ, നസെര് പണ്ഡിറ്റ്, അഫാഖ് ഭട്ട്, സബ്സര് ഭട്ട്, അനീസ്, ഇഷ്ഫാഖ്, വസീം ഷാ, തരിഖ് പണ്ഡിറ്റ് എന്നിവരാണ് ചിത്രത്തിലുള്ളത്. ഇതില് താരിഖ് 2016 മെയ് മാസം കീഴടങ്ങി ബാക്കി എല്ലാവരും കൊല്ലപ്പെട്ടു.
