ന്യൂഡല്ഹി: കേരളത്തിലെ നിപ്പ വൈറസ് ബാധ നിയന്ത്രണവിധേയമാണെന്ന് കേന്ദ്ര ആരോഗ്യ മന്ത്രി ജെ.പി നന്ദ. ആശങ്കപ്പെടേണ്ട സാഹചര്യമില്ല. കേരളത്തിന് ആവശ്യമായ സഹായങ്ങള് നല്കാന് കേന്ദ്ര ആരോഗ്യ സെക്രട്ടറിയെ ചുമതലപ്പെടുത്തിയിട്ടുണ്ട്. സോഷ്യല് മീഡിയയിലെ വ്യാജ പ്രചരണങ്ങള് വിശ്വസിക്കരുതെന്നും കേന്ദ്രമന്ത്രി പറഞ്ഞു.
അതേസമയം നിപ്പ വൈറസ് വായുവിലൂടെ പകരില്ലെന്ന് സംസ്ഥാന സര്ക്കാര് വ്യക്തമാക്കി. ലോകാരോഗ്യ സംഘടന ഇക്കാര്യം അറിയിച്ചതായി സംസ്ഥാന ആരോഗ്യ മന്ത്രി കെ.കെ ഷൈലജ വ്യക്തമാക്കി. രോഗം വായുവിലൂടെ പടര്ന്നേക്കുമെന്ന് ഇന്നലെ കേന്ദ്രം സംഘം ആശങ്ക പ്രകടിപ്പിച്ചിരുന്നു.
നിപ്പ വൈറസ് മൂലം മരിക്കുന്നവരുടെ മൃതദേഹം ബന്ധുക്കള്ക്ക് വിട്ടുനല്കില്ലെന്ന് മന്ത്രി വ്യക്തമാക്കി. ഇക്കാര്യത്തില് സര്ക്കാര് പൊതു മാനദണ്ഡം സ്വീകരിച്ചിട്ടുണ്ട്. നിപ്പ വൈറസുമായി ബന്ധപ്പെട്ട് സാമൂഹ്യമാധ്യമങ്ങളില് കുപ്രചാരണം നടത്തുന്നവര്ക്കെതിരെ നിയമനടപടി സ്വീകരിക്കും. ജോലിക്കിടെ മരിച്ച നേഴ്സ് ലിനിയുടെ കുടുംബത്തിന് സര്ക്കാര് സഹായം നല്കും. ഇക്കാര്യം മന്ത്രിസഭാ യോഗത്തില് തീരുമാനിക്കുമെന്നും മന്ത്രി കൂട്ടിച്ചേര്ത്തു.
