സത്യമറിയാതെ വവ്വാലുകളെ കൊല്ലാന്‍ വരട്ടെയെന്ന് മൃഗസംരക്ഷണ വകുപ്പ് ; കോട്ടയത്തെയും കുമരകത്തെയും ഷാപ്പുകാരുടെ കഞ്ഞികുടി മുട്ടുന്നു...!!

കോഴിക്കോട്: മലപ്പുറവും കോഴിക്കോടും നിപാ വൈറസ് ഭീതിയിലായതോടെ മലയാളികള്‍ ഏറ്റവും വെറുക്കുന്ന ജീവിയായി മാറിയിട്ടുള്ള വവ്വാലിനെ അങ്ങിനെ വില്ലനായി കരുതാന്‍ വരട്ടേയെന്ന് കേന്ദ്ര മൃഗസംരക്ഷണ വകുപ്പ്.

നിപ വൈറസ് പടര്‍ത്തുന്നത് വവ്വാലാണെന്ന് സ്ഥിരീകരിച്ചിട്ടില്ലെന്നും വവ്വാലില്‍ നിന്നെടുത്ത സാമ്പിളുകള്‍ പരിശോധന നടത്തി വെള്ളിയാഴ്ച പുറത്തു വരുന്ന റിപ്പോര്‍ട്ടിലേ ഇക്കാര്യം കൃത്യമായി പറയാനാകൂ എന്നാണ് കേന്ദ്ര മൃഗ സംരക്ഷണ വിഭാഗം പറയുന്നത്.

ചൊവ്വാഴ്ച ശേഖരിച്ച സാമ്പിള്‍ ഭോപ്പാല്‍ നാഷണല്‍ ഇന്‍സ്റ്റിറ്റിയൂട്ട് ഓഫ് ഹൈ സെക്യൂരിറ്റി ആനിമല്‍ ഡിസീസിലേക്കാണ് അയയ്ക്കുന്നത്. പഴങ്ങള്‍ തിന്നുന്ന തരത്തിലുള്ള വവ്വാലുകളാണ് രോഗം പടര്‍ത്തുന്നതെന്നാണ് വിലയിരുത്തല്‍.

എന്നാല്‍ നിപയുമായി ബന്ധപ്പെട്ട വാര്‍ത്ത പുറത്തു വന്ന ശേഷം പന്തിരിക്കരയിലെ ഉപയോഗ ശൂന്യമായ കിണറ്റില്‍ കണ്ടെത്തിയത് പ്രാണികളെ തിന്നുന്ന തരത്തിലുള്ള വവ്വാലുകളെയാണ്. രോഗം പടര്‍ത്തുന്നത് ദേശാടനക്കിളികളാണോ എന്നതും സംശയമായി നില്‍ക്കുകയാണ്.

അനാവശ്യമായി വവ്വാലുകളെ കൊല്ലുന്നത് ജൈവ വൈവിദ്ധ്യത്തെ ബാധിക്കുമെന്നാണ് മൃഗസംരക്ഷണ വിഭാഗത്തിന്റെ ആശങ്ക. നിപാ വന്നതോടെ ശരിക്കും കഞ്ഞികുടി മുട്ടിയിരിക്കുന്നത് കോട്ട​യത്തെയും ആലപ്പുഴയിലെയും ഷാപ്പുകള്‍ക്കാണ്.

കോട്ടയം ജില്ലയിലെ മലയോര മേഖലകളിലും പടിഞ്ഞാറന്‍ മേഖലകളിലുമുള്ള ഷാപ്പുകളിലും ആലപ്പുഴയിലും വില്‍പ്പന കുത്തനെ ഇടിഞ്ഞു. ഇരുനൂറു ലിറ്റര്‍ കള്ള് അളക്കുന്ന ഷാപ്പുകളില്‍ പോലും പകുതിപോലും ചെലവാകാത്ത അവസ്ഥയാണ്.

വവ്വാല്‍ കള്ളുകുടിക്കാന്‍ സാധ്യതയുള്ളതിനാല്‍ കള്ളുകുടിക്കുന്നവര്‍ ശ്രദ്ധിക്കണമെന്ന് ആരോഗ്യവകുപ്പ് മുന്നറിയിപ്പു നല്‍കിയിരുന്നു. വവ്വാലിന് ഏറെ ഇഷ്ടപ്പെട്ട പാനീയമാണു കളള്. കള്ളു ചെത്തുന്ന കുലകളില്‍ തൂങ്ങിക്കിടന്നാണു വവ്വാലുകള്‍ കള്ളു കുടിക്കുന്നത്. ഇങ്ങനെ വവ്വാലുകള്‍ കള്ളു കുടിക്കുമ്പോള്‍ വവ്വാലിന്റെ സ്രവവും കാഷ്ഠവും കള്ളു ശേഖരിക്കുന്ന കലത്തില്‍ വീഴുമെന്നാണ് ആരോഗ്യവകുപ്പിന്റെ മുന്നറിയിപ്പ്.

പനയോ തെങ്ങോ ചെത്തുന്ന സ്ഥലങ്ങള്‍ കണ്ടെത്തിയാല്‍ വവ്വാലുകള്‍ കൂട്ടത്തോടെ എത്തുകയാണു പതിവ്. പത്തു വവ്വാലുകള്‍ എത്തിയാല്‍ രണ്ടു ലിറ്ററോളം കള്ള അകത്താക്കുമെന്നാണു ചെത്തുകാര്‍ പറയുന്നത്. നിപ െവെറസിന്റെ പശ്ചാത്തലത്തില്‍ വവ്വാലകളുടെ മൂത്രം, കാഷ്ഠം, ഉമിനീര്‍ എന്നിവയുമായി സമ്പര്‍ക്കം പുലര്‍ത്തുന്നത് ഒഴിവാക്കണം. തുറന്നുവച്ച പാത്രങ്ങളില്‍ ശേഖരിക്കുന്ന കള്ളു കുടിക്കുന്നത് ഒഴിവാക്കുക.

വവ്വാലുകള്‍ ഭക്ഷിച്ച ഫലവര്‍ഗങ്ങള്‍ കഴിക്കരുത്, വവ്വാലുകളുടെ കാഷ്ഠം പുരളാന്‍ സാധ്യതയുള്ള കാടുകളിലും വൃക്ഷങ്ങളുടെ ചുവട്ടിലും പോകരുത്, മരത്തില്‍ കയറരുത് തുടങ്ങിയ നിര്‍ദേശങ്ങളാണ് ആരോഗ്യവകുപ്പ് നല്‍കുന്നത്.