കേംബ്രിഡ്ജ്: ബ്രിട്ടണില് ഇന്ത്യന് വിദ്യാര്ത്ഥിക്കു നേരെ സ്വദേശിയുടെ വംശീധിക്ഷേപം. ഹിജാബ് ധരിച്ച യുവതിക്കെതിരെ നടത്തിയ അശ്ലീല പരാമര്ശം തടയാന് ശ്രമിച്ചതാണ് സ്വദേശിയെ പ്രകോപിപ്പിച്ചത്. 'ബ്രെക്സിറ്റ്, സ്വന്തം നാട്ടിലേക്ക് പോകൂ' എന്നാണ് ഇയാള് ഇന്ത്യക്കാരനോട് പറഞ്ഞത്.
കേംബ്രിഡ്ജ് യൂണിവേഴ്സിറ്റിയിലെ പൊളിറ്റിക്കല് സയന്സ് വിദ്യാര്ത്ഥിയായ റികേഷ് അദ്വാനി (28)ക്കാണ് അധിക്ഷേപം നേരിട്ടതെന്ന് കേംബ്രിഡ്ജ് ന്യൂസ് റിപ്പോര്ട്ട് ചെയ്യുന്നു. കേംബ്രിഡ്ജിലെ കണ്ഫോര്ഡ് ഹൗസ് സര്ജറി ആശുപത്രിയില് ആണ് സംഭവം. തന്റെ കയ്യില് നിന്നും താളെ വീണ ബാഗ് എടുക്കാന് യുവതി ശ്രമിക്കുന്നതിനിടെയാണ് സ്വദേശി മോശം പരാമര്ശം നടത്തിയത്. ഇത് നിര്ത്താന് ആവശ്യപ്പെട്ടതാണ് റികേഷിനെതിരെ തിരിയാന് ഇയാളെ പ്രേരിപ്പിച്ചത്.
ഇക്കാലത്തും ഇത്തരം മര്ക്കടമുഷ്ഠിക്കാരുണ്ടെന്ന് തനിക്ക് വിശ്വസിക്കാന് കഴിയുന്നില്ലെന്ന് റികേഷ് പറയുന്നു. വളരെ മാന്യമായാണ് താന് അദ്ദേഹത്തോട് സംസാരിച്ചത്. ഒരാള്ക്കും അംഗീകരിക്കാന് കഴിയാത്തതാണ് അയാളുടെ പെരുമാറ്റം. അയാള് അനാവശ്യമായാണ് തന്റെ നേരെ ദേഷ്യപ്പെട്ടതെന്നും റികേഷ് അദ്വാനി പറയുന്നു. ബ്രിട്ടണിലെ ഭവനരഹിതര്ക്കായി പ്രവര്ത്തിക്കുന്ന സന്നദ്ധ സംഘടനയിലെ അംഗമാണ് റികേഷ്.
അധിക്ഷേപം നേരിട്ടതില് റികേഷ് പരാതി നല്കിയെങ്കിലും ഇതുവരെ അറസ്റ്റ് നടന്നിട്ടില്ലെന്ന് പോലീസ് വ്യക്തമാക്കി. സംഭവത്തില് കണ്ഫോര്ഡ് ഹൗസ് സര്ജറി ആശുപത്രി അധികൃതര് ഖേദം പ്രകടിപ്പിച്ചു.
