തിരുവനന്തപുരം: താരസംഘടനയായ അമ്മയ്ക്കെതിരെ രൂക്ഷവിമര്ശനവുമായി ചലച്ചിത്ര അക്കാദമി ചെയര്മാന് കമല്. അമ്മ ജനാധിപത്യ വിരുദ്ധ സംഘടനയാണെന്നും അവരില് നിന്ന് ജനാധിപത്യം പ്രതീക്ഷിക്കുന്ന നമ്മളാണ് വിഡ്ഢികളെന്നും കമല് പറഞ്ഞു. താരസംഘടനയില് നിന്ന് രാജിവച്ച നാല് നടിമാരുടേത് ധീരമായ നിലപാടാണെന്നും അവരെ ചരിത്രത്തില് രേഖപ്പെടുത്തുമെന്നും കമല് കൂട്ടിച്ചേര്ത്തു.
എന്തുകൊണ്ടാണ് വിവാദത്തില് പ്രതികരിക്കാത്തത് എന്ന് പലരും ചോദിച്ചു. അതിനുള്ള ഉത്തരം പോത്തിനോട് വേദമോതിയിട്ട് കാര്യമില്ല. ഈ സംഘടനയിലെ നിര്ഗുണരോട് ഒന്നും പറഞ്ഞിട്ട് കാര്യമില്ല. സംവിധായക ജീവിതത്തിലെ 35 വര്ഷത്തിന്റെ അനുഭവത്തില് ഞാന് തിരിച്ചറിഞ്ഞതാണിത്-കമല് പറഞ്ഞു.
സിനിമ തുടങ്ങിയ കാലം മുതല് ലൈംഗിക ചൂഷണം നടക്കുന്നുണ്ട്. ഇന്ന് പെണ്കുട്ടികള് ധൈര്യപൂര്വം പുറത്ത് പറയുന്നത് കൊണ്ടാണ് ജനം അറിയുന്നത്. ഈ ലൈംഗിക ചൂഷണത്തേക്കാള് ഭീകരമാണ് സിനിമയിലെ പുരുഷാധിപത്യം. ജാതീയമായ വേര്തിരിവ് എറ്റവും കൂടുതലുള്ള മേഖലയാണ് സിനിമയെന്നും കമല് പറഞ്ഞു.
തിരുവനന്തപുരം മാര് ഇവാനിയോസ് കോളജില് സംസ്കാര സാഹിതി സംസ്ഥാന ശില്പ്പശാല പ്രതിരോധത്തിന്റെ വര്ത്തമാനം എന്ന പരിപാടിയില് പങ്കെടുത്ത് സംസാരിക്കുകയായിരുന്നു അദ്ദേഹം.
