ന്യൂഡല്ഹി: ഡല്ഹിയിലെ സ്കൂളില് പത്താം ക്ലാസ് വിദ്യാര്ത്ഥി സഹപാഠികളുടെ മര്ദ്ദനമേറ്റ് മരിച്ചു. തലസ്ഥാന നഗരിയില് ജ്യോതിനഗറിലെ എസ്കെവി സര്ക്കാര് സ്കൂളിലാണ് ബുധനാഴ്ച ദാരുണ സംഭവം നടന്നത്.
പതിനേഴുകാരനായ ബാബര്പുര് സ്വദേശിയായ ഗൗരവ് ആണ് കൊല്ലപ്പെട്ടത്. ക്ലാസ് ടീച്ചറെ കാണാന് സ്റ്റാഫ് റൂമിലേക്ക് പോകുംവഴിയാണ് ഗൗരവിനു നേരെ അതിക്രൂരത നടന്നത്. സഹോദരനായ ഗോവിന്ദയാണ് ഗൗരവിനെ ആശുപത്രിയില് എത്തിച്ചത്. ആശുപത്രിയില് എത്തിച്ചപ്പോഴേയ്ക്കും വിദ്യാര്ത്ഥി മരിച്ചിരുന്നു.
വിദ്യാര്ത്ഥികള് ഗൗരവിനെ ആക്രമിക്കാനുണ്ടായ കാരണം വ്യക്തമായിട്ടില്ല. വിവരമറിഞ്ഞ് സ്കൂളില് എത്തിയപ്പോള് ഗൗരവ് മര്ദ്ദനമേറ്റ് അത്യാസന്ന നിലയിലായിരുന്നെന്ന് പോലീസ് പറയുന്നു. അന്വേഷണം പുരോഗമിക്കുകയാണ്.
