ന്യൂഡല്ഹി: കേന്ദ്ര പ്രതിരോധമന്ത്രി നിര്മ്മലാ സീതാരാമന് തമിഴ്നാട് ഉപമുഖ്യമന്ത്രി ഒ. പനീര്ശെല്വത്തെ കാണാന് കൂട്ടാക്കാത്തതായി സൂചന. ചൊവ്വാഴ്ച ഡല്ഹിയില് പ്രതിരോധമന്ത്രിയുടെ ഓഫീസിന് മുന്നിലെത്തിയ ഒപിഎസ് 20 മിനിട്ടോളം കാത്തുനിന്നശേഷം തിരികെ മടങ്ങുകയായിരുന്നു.
എന്നാല്, ഒപിഎസിന് ഒപ്പം പോയ എഐഎഡിഎംകെ എംഎല്എ ഡോ. വി മൈത്രേയനെ കണ്ടു. നേരത്തെ അപ്പോയിന്മെന്റ് എടുത്തതിന്റെ അടിസ്ഥാനത്തിലാണ് എംഎല്എയുമായി കൂടിക്കാഴിച നടത്തിയത്. ഒപിഎസിനെ കണ്ടില്ലെന്നും എംഎല്എയെ കണ്ടകാര്യവും വ്യക്തമാക്കി കേന്ദ്രമന്ത്രിയുടെ ഓഫീസ് ട്വിറ്റ് ചെയ്യുകയും ചെയ്തിരുന്നു.
ഡല്ഹിയിലേക്ക് പോയ ഒപിഎസ് നിര്മ്മലാ സീതാരാമനുമായി കൂടിക്കാഴ്ച നടത്തിയതായി ചില തമിഴ് മാധ്യമങ്ങള് വാര്ത്തകള് നല്കിയപ്പോള് അതു തിരുത്തി പ്രതിരോധമന്ത്രിയുടെ ഓഫീസ് രംഗത്തു വരികയും ചെയ്തു.
എന്തും താങ്ങാനുള്ള ഹൃദയം വേണമെന്ന് ഇതേക്കുറിച്ച് ഒപിഎസ് പ്രതികരിച്ചു.
രോഗബാധിതനായ സഹോദരന് മധുരയില് നിന്നും ചെന്നൈയിലേക്ക് പോകുന്നതിന് എയര് ആംബുലെന്സ് വിട്ടു നല്കിയതിന് നന്ദി പറയുന്നതിനാണ് ഇന്നലെ രാത്രി ഒപിഎസ് ഡല്ഹിയിലെത്തിയത്. പ്രതിരോധമന്ത്രിയെ കാണുമെന്ന് അദ്ദേഹം ഇന്നലെ പ്രഖ്യാപിക്കുകയും ചെയ്തിരുന്നു.
മൈത്രേയനെ കൂടാതെ കെ.പി.മുനിസ്വാമി, മനോജ് പാണ്ഡ്യന് എന്നിവരും ഒപിഎസിന് ഒപ്പമുണ്ടായിരുന്നു. അതില് പനീര്ശെല്വത്തേയും മൈത്രേയനും മാത്രമാണ് മന്ത്രിയുടെ ഓഫീസിലേക്ക് പോയത്. ചേംബറിന് മുന്നില് 20 മിനിട്ടോളം കാത്തിരുന്ന ശേഷം മൈത്രേയനെ മാത്രം ചേംബറിലേക്ക് വിളിക്കുകയും ചെയ്തു. പിന്നീട് മൈത്രേയന് പുറത്തുവന്നപ്പോള് അദ്ദേഹത്തോടൊപ്പം തിരികെ വരികയും ചെയ്യുകയായിരുന്നു.
