കോട്ടയം/തിരുവനന്തപുരം : ബാലകൃഷ്ണപിള്ളയുടെ നേതൃത്വത്തിലുളള കേരളാ കോണ്ഗ്രസ് -ബിയും സ്കറിയാ തോമസിന്റെ നേതൃത്വത്തിലുളള കേരളാ കോണ്ഗ്രസും തമ്മില് ലയിക്കാനുളള നീക്കം പൊളിച്ചത് സി.പി.എം. നേതൃത്വം. ലക്ഷ്യം ഇടതുമുന്നണി പ്രവേശനവും കെ.ബി. ഗണേഷ്കുമാറിന്റെ മന്ത്രി സ്ഥാനമാണെന്നു വ്യക്തമായതോടെ സി.പി.എം. ലയനനീക്കം പൊളിക്കുകയായിരുന്നു. ഇക്കാര്യത്തില് മുഖ്യമന്ത്രി പിണറായി വിജയനും ഇടപെട്ടുവെന്നാണു സൂചന.
മുഖ്യമന്ത്രിയെ നേരില് കണ്ടശേഷമാണ് ലയിക്കാന് തീരുമാനമെടുത്തതെന്ന് ഇരുനേതാക്കളും മാധ്യമപ്രവര്ത്തകരെ അറിയിച്ചത്. ബാലകൃഷ്ണപിളളയ്ക്ക് പാര്ട്ടിയുടെ ചെയര്മാന് സ്ഥാനവും ഗണേഷിനു പാര്ലമെന്ററി പാര്ട്ടി നേതൃസ്ഥാനവുമെന്നായിരുന്നു ധാരണ. എന്നാല്, ഇതിനിടെയാണു സി.പി.എം. നേതാക്കള് രംഗത്തിറങ്ങിയത്. നിലവില് ക്യാബിനറ്റ് റാങ്കോടെയാണ് ആര്. ബാലകൃഷ്ണപിളള മുന്നോക്ക വികസന കോര്പ്പറേഷന് ചെയര്മാന് സ്ഥാനം വഹിക്കുന്നത്. ഇതിനു പുറമേ പാര്ട്ടി ചെയര്മാന് സ്ഥാനവും ബാലകൃഷ്ണപിളളയ്ക്ക് നല്കുന്നത് ശരിയല്ലെന്നായിരുന്നു സി.പി.എം നേതാക്കളുടെ ഉപദേശം. ഇതോടെ സ്കറിയാ തോമസ് നിലപാട് തിരുത്തി. പാര്ട്ടിയുടെ ചെയര്മാന് സ്ഥാനമോ അല്ലെങ്കില് കോര്പ്പറേഷന് ചെയര്മാന് സ്ഥാനമോ തങ്ങള്ക്കു നല്കണമെന്നു സ്കറിയ തോമസ് ആവശ്യപ്പെട്ടു. തയാറല്ലെന്നു പിള്ള വ്യക്തമാക്കിയതോടെ ലയനവും പൊളിഞ്ഞു.
നിലവില് ഒരു എം.എല്.എ. മാത്രമുളള കോണ്ഗ്രസ്- എസിന് മന്ത്രിസ്ഥാനം നല്കിയിട്ടുണ്ട്. പാര്ട്ടി ഇടതു മുന്നണിയുടെ ഭാഗമായതിനാലാണ് മന്ത്രി സ്ഥാനം നല്കിയതെന്നാണ് സി.പി.എമ്മിന്റെ നിലപാട്. ഇതോടെയാണു സ്കറിയ തോമസ് വിഭാഗം വഴി ഇടതുമുന്നണിയിലെത്താന് പിള്ള വിഭാഗം കരുക്കള് നീക്കിയത്.
ഗണേഷിന് മന്ത്രിസ്ഥാനം നല്കുന്നതിനെതിരേ സി.പി.എംമ്മിലെ ഒരു വിഭാഗം രംഗത്തുണ്ട്. അഴിമതിക്കേസില് ശിക്ഷിക്കപ്പെട്ട പിള്ള മുന്നണിയുടെ ഭാഗമാക്കുന്നത് അഴിമതി വിരുദ്ധ നിലപാടുമായി മുന്നോട്ടു പോകുന്ന ഇടതു സര്ക്കാരിനു തിരിച്ചടിയാകുമെന്ന വിലയിരുത്തലും ലയനനീക്കം പൊളിയാന് കാരണമായി. അഴിമതി ആരോപണം നേരിട്ട കെ.എം മാണിയെ മുന്നണിയിലെടുക്കുമെന്ന തരത്തിലുള്ള ചര്ച്ചകള് ഉണ്ടായപ്പോള് വി.എസും സി.പി.ഐയും എതിര്പ്പുമായി രംഗത്തു വന്നിരുന്നു. അതിനിടെ, ഫ്രാന്സിസ് ജോര്ജിന്റെ നേതൃത്വത്തിലുള്ള ജനാധിപത്യ കേരളാ കോണ്ഗ്രസുമായി ലയിക്കാനുള്ള ശ്രമം സ്കറിയാ തോമസ് വിഭാഗം ശ്രമം തുടങ്ങിയിട്ടുണ്ട്. സ്കറിയാ തോമസ് വിഭാഗത്തെ പിളര്ത്താന് കേരളാ കോണ്ഗ്രസ് (ബി) നീക്കം നടത്തുന്നതായും സൂചനയുണ്ട്. ഇടഞ്ഞു നില്ക്കുന്ന പി.എം. മാത്യുവുമായി ബന്ധമുണ്ടാക്കി സ്കറിയാ വിഭാഗത്തെ പിളര്ത്താനാണ് ബാലകൃഷ്ണപിള്ളയുടെ നീക്കം.
വീരേന്ദ്രകുമാറിന്റെ ജനതാദള്, ജനാധിപത്യ കേരളാ കോണ്ഗ്രസ്, ഐ.എന്.എല്., ജെ.എസ്.എസ്., സി.എം.പി., നാഷണലിസ്റ്റ് സെക്യുലര് കോണ്ഫറന്സ്, ആര്.എസ്.പി.(എല്) തുടങ്ങിയ പാര്ട്ടികളും ഇടതുമുന്നണിയില് പ്രവേശനം കാത്തു നില്പ്പുണ്ട്.
