കണ്ണൂര്: പ്രളയക്കെടുതി നേരിടുന്ന സംസ്ഥാനത്തിന് കൈത്താങ്ങുമായി കോണ്ഗ്രസ് നേതാവ് എ.പി അബ്ദുള്ളക്കുട്ടി. തന്റെ പേരിലുള്ള പതിനഞ്ച് സെന്റ് ഭൂമി ദുരിബാധിതര്ക്കായി നല്കാന് അബ്ദുള്ളക്കുട്ടി തീരുമാനിച്ചു. പത്ത് ലക്ഷത്തിലധികം രൂപ വിപണി വിലയുള്ള ഭൂമിയാണ് അബ്ദുള്ളക്കുട്ടി സൗജന്യമായി വിട്ടുനല്കുന്നത്. കെ.പി.സി.സിയുടെ ആയിരം വീട് പദ്ധതിയിലേക്കാണ് അബ്ദുള്ളക്കുട്ടി ഭൂമി വിട്ടുകൊടുക്കുന്നത്.
സെന്റിന് എണ്പതിനായിരത്തിലധികം രൂപ വിലയുള്ള ഭൂമിയാണ് അബ്ദുള്ളക്കുട്ടി വിട്ടുകൊടുക്കുന്നത്. ഈ സ്ഥലത്ത് നാല് കുടുംബങ്ങളെയെങ്കിലും പാര്പ്പിക്കാനാകുമെന്നാണ് പ്രതീക്ഷ. പ്രളയ ദുരിതത്തില് നിന്ന് കരകയറാന് സംസ്ഥാനത്തിന് ഇനിയും സഹായം ആവശ്യമാണ്. മറ്റുള്ളവര്ക്ക് കൂടി പ്രചോദനമാകാനാണ് താന് ഈ തീരുമാനം എടുത്തതെന്നും അബ്ദുള്ളക്കുട്ടി പറഞ്ഞു.
മുന് എം.പി എന്ന നിലയില് ലഭിക്കുന്ന ഒരു മാസത്തെ പെന്ഷന് തുകയായ 25700 രൂ% മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കാനും അബ്ദുള്ളക്കുട്ടി തീരുമാനിച്ചു.
