പാറ്റ്ന: തിരഞ്ഞെടുപ്പ് തന്ത്രജ്ഞന് പ്രശാന്ത് കിഷോര് ജെ.ഡി.യുവില് ചേര്ന്നു. പാറ്റ്നയില് നടന്ന ചടങ്ങിലാണ് പ്രശാന്ത് ജെ.ഡി.യുവില് ചേര്ന്നത്. അടുത്ത വര്ഷം നടക്കാനിരിക്കുന്ന ലോക്സഭാ തിരഞ്ഞെടുപ്പില് നിതീഷ് കുമാറിന് വേണ്ടി പ്രശാന്ത് കിഷോര് തന്ത്രങ്ങള് മെനയും. ജെ.ഡി.യുവില് ചേര്ന്നതായി പ്രശാന്ത് കിഷോര് ട്വിറ്ററില് സ്ഥിരീകരിച്ചു. ബീഹാറിലെ ബക്സര് സ്വദേശിയാണ് പ്രശാന്ത്.
പ്രശാന്ത് കിഷോറിനെ ഒപ്പം നിര്ത്തിക്കൊണ്ട് സഖ്യകക്ഷിയായ ബി.ജെ.പിയുമായി ശക്തമായ വിലപേശലിനാണ് നിതീഷ് കുമാര് തയ്യാറെടുക്കുന്നതെന്നാണ് സൂചന. ബക്സര് സീറ്റ് പ്രശാന്ത് കിഷോറിന് നല്കിയേക്കുമെന്നും സൂചനയുണ്ട്. എന്നാല് ഇക്കാര്യത്തില് അന്തിമ തീരുമാനമായിട്ടില്ല. ബി.ജെ.പി നേതാവും കേന്ദ്രമന്ത്രിയുമായ അശ്വിനി കുമാര് ചൗബേയാണ് നിലവില് ബക്സറിലെ സിറ്റിംഗ് എം.പി.
2012ലെ ഗുജറാത്ത് നിയമസഭാ തിരഞ്ഞെടുപ്പിലും 2014ലെ ലോക്സഭാ തിരഞ്ഞെടുപ്പിലും നരേന്ദ്ര മോഡിക്കും ബി.ജെ.പിക്കും വേണ്ടി തന്ത്രങ്ങള് മെനഞ്ഞ തിരഞ്ഞെടുപ്പ് തന്ത്രജ്ഞനാണ് പ്രശാന്ത് കിഷോര്. കഴിഞ്ഞ ലോക്സഭാ തിരഞ്ഞെടുപ്പിന് ശേഷം ബി.ജെ.പിയുമായി അകന്ന പ്രശാന്ത് കിഷോര് ബീഹാറില് മഹാസഖ്യത്തിന് വേണ്ടിയും പഞ്ചാബില് കോണ്ഗ്രസിന് വേണ്ടിയും തന്ത്രം മെനഞ്ഞു.
പഞ്ചാബ് നിയമസഭാ തിരഞ്ഞെടുപ്പില് കോണ്ഗ്രസ് വിജയിച്ചതില് പ്രശാന്ത് കിഷോറിന്റെ തന്ത്രങ്ങള് സഹായിച്ചുവെന്ന് മുഖ്യമന്ത്രി അമരീന്ദര് സിംഗ് പരസ്യമായി അംഗീകരിച്ചിരുന്നു. എന്നാല് യു.പി നിയമസഭാ തിരഞ്ഞെടുപ്പില് സമാജ്വാദി പാര്ട്ടി-കോണ്ഗ്രസ് സഖ്യമെന്ന തന്ത്രം പരാജയപ്പെട്ടു. അടുത്തിനെ ആന്ധ്രയില് ജഗന് മോഹന് റെഡ്ഡിയുമായി ചേര്ന്ന് പ്രശാന്ത് കിഷോര് പ്രവര്ത്തിച്ചിരുന്നു.
