ശ്രീനഗര്: ജമ്മു കശ്മീരിലെ കുല്ഗാം ജില്ലയില് തീവ്രവാദികളുടെ ആക്രമണത്തില് സൈനികന് കൊല്ലപ്പെട്ടു. മുഖ്തര് അഹ്മദ് മാലിക് എന്ന സൈനികനെയാണ് തീവ്രവാദികള് വെടിവെച്ച് കൊന്നത്. കുല്ഗാമിലുള്ള സൈനികന്റെ വീട്ടില് വെച്ചായിരുന്നു സംഭവം. മകന്റെ സംസ്കാര ചടങ്ങില് പങ്കെടുക്കവെ മാലികിന് നേരെ വീടിനുള്ളില് അതിക്രമിച്ച് കയറിയ ഭീകരസംഘം വെടിയുതിര്ക്കുകയായിരുന്നു.
ലാന്സ് നായിക് മാലികിന്റെ മകന് അപകടത്തെ തുടര്ന്ന് സൈനിക ആശുപത്രിയില് ചികിത്സയിലായിരുന്നു. 15നാണ് മകന് മരിക്കുന്നത്. മകന്റെ ശവസംസ്കാരവുമായി ബന്ധപ്പെട്ട് വീട്ടില് നടന്ന ചടങ്ങുകളില് പങ്കെടുക്കുകയായിരുന്നു മാലിക്. ഇതിനിടെയാണ് ഒരു സംഘം ഭീകരവാദികള് വീട്ടില് അതിക്രമിച്ചു കയറി ആക്രമണം നടത്തിയത്.
മാലിക്കിന്റെ സുഹൃത്തിനെ പിന്തുടര്ന്നാണ് ഭീകരവാദികള് വീട്ടില് എത്തിയത്. തുടര്ന്ന് തോക്ക് ചൂണ്ടി ഭീഷണിപ്പെടുത്തി ഭീകരവാദികള് മാലികിനെ ചോദ്യം ചെയ്യാന് തുടങ്ങി. കരസേനയുടെ വിന്യസിക്കലുമായി ബന്ധപ്പെട്ട ചോദ്യങ്ങളായിരുന്നു കൂടുതലായും ഭീകരവാദികള് ചോദിച്ചതെന്ന് ദൃക്സാക്ഷികള് വ്യക്തമാക്കി.
'നിനക്ക് വേണമെങ്കില് എന്നെ വെടിവയ്ക്കാം, പക്ഷേ എന്നോട് ചോദ്യങ്ങളൊന്നും ചോദിക്കരുത്'- എന്നായിരുന്നു ഭീകരവാദികളോട് മാലിക് അവസാനമായി പറഞ്ഞ വാക്കുകള്. തുടര്ന്ന് ഭീകരര് മാലികിന് നേരെ വെടിയുതിര്ക്കുയായിരുന്നു.
