യുകെയിലെ ബ്രിസ്റ്റോള് സര്വകലാശാലയിലെ വിദ്യാര്ഥികള് ശുചീകരണ തൊഴിലാളിക്ക് നല്കിയ സമ്മാനമാണ് ഏവരും പ്രശംസിക്കുന്നത്. ശുചീകരണത്തൊഴിലാളിക്ക് സ്വദേശത്തു പോയി ഹോളിഡേ ആഘോഷിക്കാന് കോളേജ് വിദ്യാര്ഥികള് സമാഹരിച്ചു നല്കിയത് 1500 പൗണ്ടാ(ഏകദേശം 1,42,622 രൂപ)ണ്. തങ്ങളുടെ സര്വകലാശാലയിലെ ശുചീകരണത്തൊഴിലാളിയായ ഹെര്മന് ഗോര്ഡോണിനാണ് ഇങ്ങനെയൊരു സമ്മാനം വിദ്യാര്ത്ഥികള് നല്കിയതെന്ന് ബിബിസി റിപ്പോര്ട്ട് ചെയ്യുന്നു.
ബ്രിസ്റ്റോള് സര്വകലാശാലയിലെ വിദ്യാര്ഥികള്ക്ക് 'കുറ്റസമ്മതം നടത്താന്' ബ്രിസ്ട്രൂത്ത് എന്നൊരു 'കണ്ഫഷന്' ഫെയ്സ്ബുക്ക് പേജുണ്ട്. അതിലൊരാള് ഹെര്മനെ കുറിച്ച് ഒരു കുറിപ്പെഴുതി. കണ്ടിട്ടുള്ളതില് വച്ച് ഏറ്റവും സന്തോഷവാനായ മനുഷ്യന് എന്നായിരുന്നു ഹെര്മനെ കുറിച്ച് അയാള് എഴുതിയിരുന്നത്. പിറ്റേന്ന് സര്വകലാശാലയിലെ മെഡിക്കല് വിദ്യാര്ഥിയായ ഹദി അല് സുബൈദി എന്ന ഇരുപതുകാരി ഇതേ പേജില് ഹെര്മനു വേണ്ടി ക്രൗഡ് ഫണ്ടിങ് ആരംഭിക്കുകയായിരുന്നു. ഒരാഴ്ചയ്ക്കുള്ളില് ധനസമാഹരണം കഴിഞ്ഞു. തുടര്ന്ന് ജൂണില് കുട്ടികള് സമാഹരിച്ച പണം ഏറ്റുവാങ്ങിയപ്പോള് ഹെര്മന് പൊട്ടിക്കരഞ്ഞു. ഇതിന്റെ ചിത്രങ്ങള് സാമൂഹിക മാധ്യമങ്ങളില് വൈറലായിരുന്നു.
ജമൈക്ക സ്വദേശിയാണ് ഹെര്മന്. 12 വര്ഷമായി ബ്രിസ്റ്റോളിലെ ജീവനക്കാരനാണ്. പത്തുവര്ഷമായി ഹെര്മന് ജമൈക്കയിലെ കുടുബത്തെ സന്ദര്ശിച്ചിട്ട്. അദ്ദേഹത്തെ നാട്ടിലേക്ക് പോകാന് സഹായിക്കുക എന്ന ലക്ഷ്യത്തോടെയാണ് വിദ്യാര്ഥികള് ക്രൗഡ് ഫണ്ടിങ്ങിലൂടെ ധനസമാഹരണം നടത്തിയത്. 230 ഓളം വിദ്യാര്ഥികള് ചേര്ന്നാണ് ഈ തുക സമാഹരിച്ചത്. തുടര്ന്ന് ഇദ്ദേഹത്തിന്റെയും ഭാര്യയുടെയും ചിത്രം ബ്രിസ്ട്രൂത്തിന്റെ പേജില് പോസ്റ്റ് ചെയ്തിരുന്നു. ജമൈക്കയിലെ പഞ്ചനക്ഷത്ര ഹോട്ടലില് ഹെര്മനും ഭാര്യ ഡെിനുസും 23ാം വിവാഹവാര്ഷികം ആഘോഷിച്ചെന്ന കുറിപ്പും ചിത്രത്തോടൊപ്പം ഉണ്ടായിരുന്നു. ശേഷം കിങ്സ്റ്റണില് കുടുംബാംഗങ്ങളെ പോയതായും ഫെയ്സ്ബുക്ക് കുറിപ്പില് പറയുന്നു.
