ന്യൂഡല്ഹി: അനാവശ്യമായി പൊതുതാല്പര്യഹര്ജികള് സമര്പ്പിക്കുന്ന പ്രവണത ഒഴിവാക്കണമെന്ന് ആവശ്യപ്പെട്ട് ചീഫ് ജസ്റ്റീസ് രഞ്ജന് ഗോഗോയ്. 'അന്നേദിനം ആരെങ്കിലും മരണപ്പെടാന് പോകുകയോ പുറന്തള്ളപ്പെടുകയോ അല്ലെങ്കില് തൂക്കിലേറ്റപ്പെടുമെന്ന് ഉറപ്പാകുകയോ ചെയ്യുന്ന ഘട്ടത്തില്' മാത്രമേ ഇത്തരം അത്യാവശ്യ ഹര്ജികള് നല്കാവൂവെന്നും അദ്ദേഹം പറഞ്ഞു. ചീഫ് ജസ്റ്റീസ് ആയി ചുമതലയേറ്റശേഷം സംസാരിക്കുകയായിരുന്നു അദ്ദേഹം.
ഹര്ജികള് അടിയന്തരമായി ലിസ്റ്റ് ചെയ്യുന്നതിനും മറ്റുമായി പുതിയ രീതി കൊണ്ടുവരും. അടിയന്തര സ്വഭാവമുള്ളതാണെന്ന് ബോധ്യപ്പെട്ടാല് അത്തരം ഹര്ജികള് മാറ്റിവയ്ക്കില്ലെന്നും അദ്ദേഹം വ്യക്തമാക്കി. കേസുകളിലെ കാലതാമസവും ദരിദ്രവിഭാഗങ്ങള്ക്ക് നീതി വൈകുന്നതുമാണ് തന്നെ അലട്ടുന്ന പ്രശ്നമെന്നും അദ്ദേഹം നേരത്തെ പറഞ്ഞിരുന്നു.
