കോഴിക്കോട്: രക്തം മാത്രമല്ല മുടിയും നഖവും കഫവുമെല്ലാം അശുദ്ധിയാണെന്നും മുടി കൊഴിഞ്ഞാല് ശുദ്ധികലശമാണ് ചെയ്യേണ്ടതെന്നും അതിന് തന്ത്രി നടയടക്കേണ്ടതില്ലെന്നും ചരിത്രകാരനും അധ്യാപകനുമായ കെ.എന് ഗണേഷ്. തന്ത്രവിധി പ്രകാരം തന്ത്രിക്ക് നടയടക്കാനുള്ള അധികാരമില്ലെന്നും നിര്ദ്ദേശിക്കാനുള്ള ഉത്തരവാദിത്വം മാത്രമേയുള്ളൂവെന്നും കെ.എന് ഗണേഷ് അഭിപ്രായപ്പെടുന്നു.
ശബരിമലയില് യുവതികള് പ്രവേശിക്കുന്ന സാഹചര്യമുണ്ടായാല് ക്ഷേത്രത്തില് രക്തം വീഴ്ത്തി അശുദ്ധമാക്കി നടയടപ്പിക്കാന് ആസൂത്രണം നടന്നിരുന്നതായുള്ള അയ്യപ്പ ധര്മസേന പ്രസിഡന്റ് രാഹുല് ഈശ്വറിന്റെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
''ബ്രാഹ്മണ തന്ത്രപ്രകാരം ചോര മാത്രമല്ല ഛര്ദ്ദി, നഖം, മുടി, ചലം, വിയര്പ്പ്, കണ്ണീര്, ശുക്ലം എന്നിവയെല്ലാം അശുദ്ധിയാണ്. മുടി കൊഴിഞ്ഞാലും, കണ്ണീര് വീണാലും അശുദ്ധിയാണ്. എന്ന് കരുതി മുടി കൊഴിയുമ്പോഴേക്കും സാധാരണ നടയടക്കാറില്ല. പുണ്യാഹം തളിക്കേണ്ട വിധിപ്രകാരം പുണ്യാഹം തളിച്ചാല് മാത്രം മതി. മാത്രമല്ല അശുദ്ധി ബിംബത്തെ ബാധിക്കുമെങ്കില് മാത്രമാണ് ശുദ്ധി കലശം ചെയ്യേണ്ടി വരുന്നത്. വിരലുമുറിച്ചാല് നടയടക്കേണ്ട ആവശ്യം തന്ത്രവിധി പ്രകാരം വരുന്നില്ല. അടച്ചിടേണ്ടി വരുന്നത് തന്നെ അവിടെ ക്രമസമാധാന പ്രശ്നം ഉയരുമ്പോള് മാത്രമാണ്.
മൃഗങ്ങളുടെയോ മനുഷ്യന്റേയോ മാംസം ബിംബത്തില് വീണാല് അങ്ങനെ ചെയ്യും. കാരണം അവിടെ ക്രമസമാധാന പ്രശ്നം ഉടലെടുത്താല്ലോ. മുന്കാലങ്ങളില് ചില ക്ഷേത്രങ്ങളില് ഇത്തരത്തില് നടയടച്ചിടേണ്ട സാഹചര്യം ഉണ്ടായിട്ടുണ്ട്. 15ാം നൂറ്റാണ്ടില് പദ്മനാഭസ്വാമി ക്ഷേത്രത്തിലെ പരികര്മ്മികളില് ഇരുകൂട്ടര് തമ്മില് വാക്കേറ്റമുണ്ടായും എതിരഭിപ്രായമുള്ളയാളെ വഴക്കിനൊടുവില് കൊല്ലുകയും ചെയ്തിരുന്നു. കൊല്ലപ്പെട്ട ആളുടെ ചോരയില് തുണിമുക്കി. ഗോപുരത്തില് പോയി കെട്ടിത്തൂക്കുകയായിരുന്നു. ഇങ്ങനെ ചെയ്താല് നടയടക്കേണ്ടി വരും. അത് ഒരുതരം വെല്ലുവിളി ഉന്നയിക്കലാണ്. അതിനാല് തന്നെ നടയടക്കാന് രാഹുല് ഈശ്വറിന് ചെയ്യാന് കഴിയുന്നത് ബിംബത്തിനടുത്ത് പോയി ആത്മഹത്യചെയ്യലാണ്. അങ്ങിനെയാണേല് ക്രമസമാധാന പ്രശ്നം വരും''.
തന്ത്രവിധി പ്രകാരം തന്ത്രിക്ക് നടയടക്കാനുള്ള അധികാരമില്ലെന്നും നിര്ദ്ദേശിക്കാനുള്ള ഉത്തരവാദിത്വം മാത്രമേയുള്ളൂവെന്നും കെ.എന് ഗണേഷ് അഭിപ്രായപ്പെട്ടു. പ്രശ്നങ്ങള് മനസിലാക്കി, ഗൗരവം പരിശോധിച്ച് ഇന്നയിന്ന ക്രിയകള് നടത്താമെന്ന് തന്ത്രിക്ക് നിര്ദേശിക്കാം. അടക്കണോ വേണ്ടയോ എന്ന തീരുമാനമെടുക്കേണ്ടത് ക്ഷേത്ര യോഗമോ ദേവസ്വമോ ആണെന്നും അദ്ദേഹം കൂട്ടിചേര്ത്തു.
