തിരുവനന്തപുരം: തിരുവിതാംകൂര് ദേവസ്വം ബോര്ഡ് പ്രസിഡന്റ് എ. പത്മകുമാറിനെ സി.പി.എം. പത്തനംതിട്ട ജില്ലാ സെക്രട്ടേറിയറ്റില്നിന്നു പുറത്താക്കുന്നു. ശബരിമല യുവതീപ്രവേശനത്തില് സര്ക്കാരിനൊപ്പം നിലയുറപ്പിക്കാത്തതാണു കുറ്റം.
പത്തനംതിട്ട ജില്ലാ കമ്മിറ്റിയില് ധാരണയായെങ്കിലും പ്രത്യാഘാതം ഭയന്ന് പരസ്യമാക്കിയിട്ടില്ല. മണ്ഡലകാലത്തിനുശേഷം ''ക്യാപിറ്റല് പണിഷ്മെന്റ്'' നടപ്പാക്കുമെന്നും സൂചന. ശബരിമലയില് യുവതികളെ പ്രവേശിപ്പിച്ച് സുപ്രീം കോടതിവിധി നടപ്പാക്കണമെന്ന കടുത്ത തീരുമാനത്തിലാണു മുഖ്യമന്ത്രി പിണറായി വിജയനും സി.പി.എമ്മും. സര്ക്കാര് പുനഃപരിശോധനാ ഹര്ജി നല്കില്ലെന്നു മുഖ്യമന്ത്രി വ്യക്തമാക്കിയതിനു ശേഷവും പത്മകുമാറിന് ഉറച്ച നിലപാടെടുക്കാന് കഴിഞ്ഞില്ല.
പുനഃപരിശോധനാ ഹര്ജി നല്കുമെന്ന തരത്തിലുള്ള പ്രസ്താവന നടത്തി. തന്റെ വീട്ടിലെ സ്ത്രീകളാരും ആചാരം ലംഘിച്ച് മലചവിട്ടില്ലെന്നു തുറന്നുപറഞ്ഞു. അതോടെ പൂര്ണമായും വില്ലന് പരിവേഷം കിട്ടിയ മുഖ്യമന്ത്രി പരസ്യമായി ശാസിച്ചു. അതിനു ശേഷവും വിശ്വാസികളെ തള്ളിപ്പറയാന് അദ്ദേഹം തയാറായില്ല. പുനഃപരിശോധനാ ഹര്ജികളും പുതിയ റിട്ട് ഹര്ജികളും സുപ്രീം കോടതി പരിഗണിക്കുമ്പോള് സ്വീകരിക്കേണ്ട നിലപാടിന്റെ കാര്യത്തില് ദേവസ്വം ബോര്ഡിന് തീരുമാനമെടുക്കാന് കഴിഞ്ഞിട്ടുമില്ല.
മുന് എം.എല്.എ. കൂടിയായ പത്മകുമാറിന് ആറന്മുളയില് നല്ല ജനസമ്മതിയുണ്ട്. എന്നാല് ശബരിമല വിഷയത്തില് ''അഴകൊഴമ്പന്'' നടപടി സ്വീകരിച്ചതുവഴി സര്ക്കാരിനെ പ്രതിസന്ധിയിലാക്കിയെന്നാണു പാര്ട്ടിയുടെ കണ്ടെത്തല്. ദേവസ്വം ബോര്ഡ് സ്ഥാനം രാജിവയ്പിക്കണമെന്ന ആവശ്യവുമുയര്ന്നു.
മണ്ഡലകാലം ആരംഭിക്കാന് ദിവസങ്ങള് മാത്രം ശേഷിക്കെ, ഇതു പ്രതിസന്ധി രൂക്ഷമാക്കുമെന്നു വാദമുയര്ന്നു. ഇതിനിടെയാണ് പത്മകുമാറിനെതിരേ നടപടിക്കു ജില്ലാ കമ്മിറ്റിയില് ധാരണയായത്. സി.പി.എമ്മില്നിന്നു പുറത്താക്കുന്നപക്ഷം പാര്ട്ടി നോമിനിയെന്ന നിലയില് ലഭിച്ച ദേവസ്വം ബോര്ഡ് പ്രസിഡന്റ് സ്ഥാനം രാജിവയ്ക്കേണ്ടിവരും. അതു ജനവികാരം കൂടുതല് എതിരാക്കുമെന്നു വിലയിരുത്തലും പത്മകുമാറിന്റെ തുടര്നടപടി എന്താകുമെന്ന ആശങ്കയുമാണ് തീരുമാനം പുറത്തുവിടാനുള്ള തടസം.
