ന്യൂഡല്ഹി: ഇന്ത്യയുടെ ഉരുക്കുമനുഷ്യന് സമര്പ്പണമായി ഉയര്ത്തിയ സര്ദാര് വല്ലഭായി പട്ടേലിന്റെ പ്രതിമ പ്രധാനമന്ത്രി ഇന്ന് രാജ്യത്തിന് സമര്പ്പിക്കും. സര്ദാറിന്റെ 143 ാമത് ജന്മവാര്ഷികത്തില് ലോകത്തിലെ ഏറ്റവും ഉയരം കൂടിയ പ്രതിമ പ്രധാനമന്ത്രി നരേന്ദ്രമോഡിയാണ് രാഷ്ട്രത്തിന് സമര്പ്പിക്കുന്നത്. 182 മീറ്റര് ഉയരമുള്ള പ്രതിമ ഗുജറാത്തിലെ നര്മദാ ഡാമിന് 3.2 കിലോമീറ്റര് മാറി ഒഴുക്കിന്റെ ദിശയിലാണ്. പ്രധാനമന്ത്രി നരേന്ദ്രമോഡിയുടെ സ്വപ്ന പദ്ധതി കൂടിയായ 'ഏകത്വ പ്രതിമ' യുടെ പണി അഞ്ചു വര്ഷം മുമ്പാണ് തുടങ്ങിയയത്. ഗുജറാത്ത് മുഖ്യമന്ത്രിയായിരുന്നു കാലത്ത് 2013 ഒക്ടോബര് 31 ന് മോഡി തന്നെയാണ് തറക്കല്ലിട്ടത്.
അഞ്ചു വര്ഷം കൊണ്ട് 2,389 കോടിയാണ് മുതല് മുടക്ക്. പ്രതിമയുടെ രാഷ്ട്ര സമര്പ്പണത്തില് പ്രധാനമന്ത്രി മണ്ണും നര്മ്മദാജലവും കലാശം നടത്തും. പ്രതിമയുടെ കാല്ചുവട്ടില് പ്രധാനമന്ത്രി പ്രത്യേക പൂജ നടത്തും. പിന്നീട് അദ്ദേഹം ഐക്യത്തിന്റെ മതില് ഉദ്ഘാടനം ചെയ്യും. ഇന്ത്യയുടെ ഉരുക്കുമനുഷ്യന്റെ പ്രതിമ നിര്മ്മിക്കുന്നതിനായി രാജ്യത്തുടനീളമുള്ള പ്രദേശങ്ങളില് നിന്നും ഇരുമ്പ് ശേഖരിച്ചിരുന്നു.10-15 ചെറിയ പാളികള് വരുന്ന 553 വെങ്കല പാളികളും പ്രതിമയ്ക്കായി ഉപയോഗിച്ചിട്ടുണ്ട്. 250 എഞ്ചിനീയര്മാരും 3,400 തൊഴിലാളികളും 33 മാസം ജോലി ചെയ്താണ് പൂര്ത്തിയാക്കിയത്്. ലോകത്ത് ഇന്നുള്ള ഏറ്റവും ഉയരം കൂടിയ പ്രതിമയായ ചൈനയിലെ ഹെനാന് പ്രവിശ്യയിലെ ബുദ്ധന്റേതിനേക്കാള് 177 അടി ഉയരം കൂടുതല് സര്ദാര് പ്രതിമയ്ക്കുണ്ട്.
പ്രതിമയില് കടല് നിരപ്പില് നിന്നും 193 മീറ്റര് ഉയരത്തില് 200 സന്ദര്ശകര്ക്ക് ഒരു സമയം പ്രവേശിക്കാവുന്ന തരത്തിലുള്ള ഒരു ഗാലറിയും ഉണ്ട്. ദിവസേനെ 15,000 സന്ദര്ശകരെയാണ് പ്രതീക്ഷിക്കുന്നത്. പട്ടേലിന്റെ ജീവിതവുമായി ബന്ധപ്പെട്ട് 2,000 ഫോട്ടോഗ്രാഫുകള് ഉള്പ്പെടെ 40,000 രേഖകള് പ്രതിമയുമായി ബന്ധപ്പെട്ട മ്യൂസിയത്തില് ഉണ്ടാകും.
ഏകതാ പ്രതിമയുമായി ബന്ധപ്പെട്ട പ്രധാന വിവരങ്ങള്.
* ലോകത്തെ ഏറ്റവും ഉയരമേറിയ പ്രതിമ
* െചെനയിലെ ബുദ്ധപ്രതിമയേക്കാള് ഉയരം. യു.എസിലെ സ്റ്റാച്യു ഓഫ് ലിബര്ട്ടിയുടെ ഇരട്ടിയോളം
* ഗുജറാത്തിലെ സര്ദാര് സരോവര് അണക്കെട്ടിന് അല്പമകലെ സാധു ബേട് തുരുത്തിലാണു സ്ഥാനം. തുരുത്തിലേക്ക് 2.5 കി.മീ. പാലം
* ഏഴു ലക്ഷം ഗ്രാമങ്ങളില്നിന്നു കാര്ഷികോപകരണങ്ങള് ശേഖരിച്ച് ഉരുക്കിയെടുത്തു
* നിര്മാണച്ചെലവ് 2,989 കോടി രൂപ
* നിര്മാണത്തിനു വേണ്ടിവന്നത് 33 മാസം മാത്രം
* രൂപകല്പ്പന: നോയ്ഡയിലെ ശില്പ്പി രാം വി. സുതര്
* നിര്മിച്ചത് ലാര്സന് ആന്ഡ് ട്യൂബ്രോ
* ഗാലറിയില് ഒരേസമയം 200 സന്ദര്ശകര്, പട്ടേല് മ്യൂസിയം
* 200 ചതുരശ്ര കിലോമീറ്റര് ജലസംഭരണിയുടെയും സത്പുര, വിന്ധ്യ മലനിരകളുടെയും വിഹഗവീക്ഷണം
* റിക്ടര് സ്കെയിലില് 6.5 തീവ്രതയുള്ള ഭൂചലനം ചെറുക്കും
* മണിക്കൂറില് 180 കി.മീ. വേഗമുള്ള കാറ്റിനെ പ്രതിരോധിക്കാന് കരുത്ത്
* പ്രതിമയ്ക്കടുത്തുള്ള ശ്രേഷ്ഠ ഭാരത് ഭവന് 128 മുറികളുള്ള ത്രിനക്ഷത്ര ഹോട്ടല്
