ആഗ്ര : ജോലി സ്ഥലത്തേക്ക് കൈക്കുഞ്ഞിനെയും കൊണ്ട് എത്തിയ ഒരു പൊലീസുദ്യോഗസ്ഥയുടെ ചിത്രമാണ് ഇപ്പോള് സോഷ്യല് മീഡിയയില് വൈറലാകുന്നത്. അര്ച്ചന എന്ന 30-കാരിയായ പൊലീസ് ഉദ്യോഗസ്ഥ പൊലീസ് സ്റ്റേഷനില് ജോലി ചെയ്ത് കൊണ്ടിരിക്കുമ്പോള് ടേബിളില് കിടന്നുറങ്ങുന്ന 6 മാസം പ്രായമുളള പെണ്കുഞ്ഞിന്റെ ചിത്രം കഴിഞ്ഞ ദിവസമാണ് വൈറലായത്.
ആഗ്രയില് നിന്നുളള അര്ച്ചന ഝാന്സി പൊലീസ് സ്റ്റേഷനിലായിരുന്നു ജോലി ചെയ്തിരുന്നത്. ഗുരുഗ്രാമിലെ ഒരു സ്വകാര്യ സ്ഥാപനത്തില് ഭര്ത്താവ് ജോലി ചെയ്യുന്നത് കൊണ്ട് കുഞ്ഞിനെ കൂടെ കൂട്ടുകയല്ലാതെ അര്ച്ചനയ്ക്ക് മറ്റൊന്നും ചെയ്യാനുണ്ടായിരുന്നില്ല. അര്ച്ചനയുടെ 11 വയസുകാരിയായ മൂത്ത കുട്ടി കാന്പൂരില് മുത്തശ്ശിയുടെ കൂടെയാണ് താമസിക്കുന്നത്.
ഉത്തര്പ്രദേശ് പൊലീസ് ഐജി അടക്കമുളളവര് ചിത്രം ഷെയര് ചെയ്തതോടെയാണ് ഡിജിപിയും ശ്രദ്ധിച്ചത്. തനിക്ക് ആഗ്രയിലേക്ക് സ്ഥലംമാറ്റം കിട്ടിയാല് ജോലി എളുപ്പമാകുമെന്നും അര്ച്ചന പറഞ്ഞിരുന്നു. തുടര്ന്ന് സംഭവം ഡിജിപിയുടെ ശ്രദ്ധയില് പെട്ട്തോടെ അര്ച്ചന സിങ്ങിന് ജന്മസ്ഥലമായ ആഗ്രയിലേക്ക് സ്ഥലംമാറ്റം നല്കി ഡിജിപി ഓപ്രകാശ് സിങ് ഉത്തരവിറക്കി. ചില പൊലീസ് ഉദ്യോഗസ്ഥരുടെ ട്വിറ്റര് അക്കൗണ്ടിലാണ് ചിത്രം ആദ്യം പ്രത്യക്ഷപ്പെട്ടത്. ഇതിന് പിന്നാലെ മറ്റുളളവരും ചിത്രം ഏറ്റെടുത്തു. ഝാന്സി ഡിഐജി സുഭാഷ് സിങ് അര്ച്ചനയ്ക്ക് 1000 രൂപ പാരിതോഷികമായി നല്കിയിരുന്നു.
