ന്യൂഡല്ഹി: പുറത്താക്കപ്പെട്ട ജോലിക്കാരന് സീനിയര് മാനേജരെ മുറിയില് ചെന്നു വെടിവെച്ചു കൊന്നു. ഫരീദാബാദിലെ വെള്ളിയാഴ്ച ഉച്ചയോടെ നടന്ന സംഭവത്തില് ജോലി പോയ ടാറ്റാ സ്റ്റീല് ജീവനക്കാരന് വിശ്വാസ് പാണ്ഡേ മാനേജര് അരിന്ദം പാലിന് നേരെ വെടി വെയ്ക്കുകയായിരുന്നു. ക്ളോസ് റേഞ്ചില് നിന്നുകൊണ്ട് അഞ്ചു തവണ നിറയൊഴിച്ച പാണ്ഡേ സംഭവശേഷം ഭീകരാന്തരീക്ഷം സൃഷ്ടിച്ച് കൊലപാതകി തോക്കുമായി സ്ഥലത്തു നിന്നും മുങ്ങുകയും ചെയ്തിരിക്കുകയാണ്. ഇയാള്ക്ക് വേണ്ടി തെരച്ചില് തുടങ്ങി.
അരീന്ദം പാല് ഉച്ചയൂണ് കഴിഞ്ഞ് ക്യാബിനില് വിശ്രമിക്കുന്ന സമയത്ത് വിശ്വാസ് പാണ്ഡേ കയറിവരികയും വെടി ഉതിര്ക്കുകയുമായിരുന്നു. അപ്പോള്തന്നെ അരീന്ദം മരണത്തിന് കീഴടങ്ങുകയും ചെയ്തു. എഞ്ചിനീയറിംഗ് ബിരുദധാരിയായ പാണ്ഡേ കമ്പനിയിലെ എക്സിക്യുട്ടീവ് മാനേജരായിരുന്നു. അച്ചടക്കരാഹിത്യം കണ്ടു പിടിച്ചതിനെ തുടര്ന്ന് ഈ വര്ഷം ആദ്യം സൂപ്പര്വൈസര് നടത്തിയ അന്വേഷണ റിപ്പോര്ട്ടിന്റെ അടിസ്ഥാനത്തില് ഇയാളെ ജോലിയില് നിന്നും പുറത്താക്കിയിരുന്നു. ജോലി പോയതിന് ശേഷം പല തവണ തിരിച്ചെടുക്കണമെന്ന് ആവശ്യപ്പെട്ട് ഇയാള് കമ്പനിയില് എത്തുക പതിവായിരുന്നു.
അരീന്ദം പാലിനെ ഇയാള് ഭീഷണിപ്പെടുത്തുന്നതും പതിവായിരുന്നു. നോട്ടീസ് കാലയളവിനുള്ളില് തിരിച്ചെടുത്തില്ലെങ്കില് ഗുരുതരമായ പ്രത്യാഘാതങ്ങള് നേരിടേണ്ടി വരുമെന്നായിരുന്നു ഭീഷണി. വെടിവെച്ച ശേഷം മുങ്ങാന് നോക്കിയ പാണ്ഡേയെ സംഭരണശാലയിലെ സഹപ്രവര്ത്തകര് തടയാന് ശ്രമിച്ചെങ്കിലും തന്നെ തൊട്ടാല് എല്ലാവരേയും വെടിവെയ്ക്കുമെന്ന് ഭീഷണിപ്പെടുത്തിയതോടെ എല്ലാവരും പിന്മാറി. തുടര്ന്ന് എല്ലാവരും ചേര്ന്ന് പാലിനെ ആശുപത്രിയിലേക്ക് കൊണ്ടുപോയെങ്കിലും വഴിമദ്ധ്യേ തന്നെ മരണത്തിന് കീഴടങ്ങി. ടാറ്റായുടെ ഹാര്ഡ്വേര് ചൗക്ക് ഓഫീസില് ആയിരുന്നു സംഭവം.
