തനിക്കു മികച്ച നടിയ്ക്കുള്ള ദേശീയ പുരസ്കാരം ലഭിച്ച തെന്മേര്ക്ക് പരുവക്കാറ്റ് എന്ന തമിഴ് ചിത്രത്തില് അഭിനയിക്കുമ്പോള് താന് ഏറ്റവും കൂടുതല് അനുകരിച്ചിരുന്നത് മണ്മറഞ്ഞ മലയാള നടന് തിലകനെയായിരുന്നു എന്ന് ശരണ്യ പൊന്വണ്ണന്. മറ്റൊരു ഇന്ഡസ്ട്രിയിലും ഇത്രയധികം അഭിനയ പ്രതിഭകള് ഇല്ല എന്നും നടി പറഞ്ഞു. ടൈംസ് ഓഫ് ഇന്ത്യയ്ക്ക് അനുവദിച്ച അഭിമുഖത്തിലായിരുന്നു താരത്തിന്റെ പ്രതികരണം.
തിലകന് സാറിനെ എല്ലാക്കാലത്തും ഇഷ്ടമാണ്. നേരില് കാണുമ്പോള് അദ്ദേഹം കുറച്ചു സീരിയസ് ആണ് എന്ന് തോന്നും. എന്നാല് സ്ക്രീനില് അദ്ദേഹം സ്നേഹരംഗങ്ങള് അഭിനയിക്കുമ്പോള് നമ്മള് കരഞ്ഞു പോകും. സ്പടികം, കിരീടം, എന്നിവ ഉദാഹരണങ്ങളാണ്- ശരണ്യ പറഞ്ഞു. സല്ലാപം മുതല് ഉദാഹരണം സുജാതവരെ മഞ്ജുവിന്റെ അഭിനയം ശ്രദ്ധിച്ചിട്ടുണ്ട് എന്നും മഞ്ജു വാര്യരുടെയും മീരാ ജാസ്മിന്റെയും അഭിനയം പലപ്പോഴും കണ്ണ് നിറയ്ക്കാറുണ്ട് എന്നും ശരണ്യ കൂട്ടിച്ചേര്ത്തു.
സ്ഥിരമായി അമ്മ വേഷങ്ങളില് എത്തുമ്പോഴും ഓരോ വേഷത്തിലും വ്യത്യസ്ഥ പുലര്ത്തുന്നത് എങ്ങനെ എന്ന ചോദ്യത്തിനു അതിനായി താന് പ്രത്യേകമായി ഒന്നും ചെയ്യാറില്ല എന്നും തന്റെ ശരീരഭാഷയില് വരുന്ന മാറ്റങ്ങള് അതില് പ്രതിഫലികുന്നതാവാം എന്നും ശരണ്യ മറുപടി പറഞ്ഞു.
കഥാപാത്രത്തിനൊത്ത് ശരീരഭാഷ രൂപീകരിക്കുന്ന കാര്യത്തില് എന്റെ റോള് മോഡല് തിലകന് സാറാണ്. അദ്ദേഹത്തിന്റെ ശരീരഭാഷ ഞാന് പലപ്പോഴും കോപ്പി ചെയ്തിട്ടുണ്ട്. തമിഴ് സിനിമകള് ചെയ്യുമ്പോള് പോലും, ഇത്തരത്തില് ഒരു കഥാപാത്രം തിലകന് സാര് എങ്ങനെ ചെയ്യും എന്ന് ആലോചിക്കും. എനിക്ക് മികച്ച നടിയ്ക്കുള്ള ദേശീയ പുരസ്കാരം ലഭിച്ച ചിത്രം ശ്രദ്ധിച്ചാല് നിങ്ങള്ക്ക് മനസ്സിലാവും അതിലെ ഓരോ സീനിലും ഞാന് തിലകന് സാറിനെ അനുകരിച്ചിട്ടുണ്ട് എന്ന്, ശരണ്യ വ്യക്തമാക്കി.
