ശബരിമല: ശബരിമലയില് ദര്ശനത്തിനായി എത്തിയ ഭിന്നലിംഗക്കാരിയെ ഭക്തര് തടഞ്ഞു. പ്രതിഷേധത്തെ തുടര്ന്ന് ഇവര് ദര്ശനം നടത്താതെ പമ്പയില് നിന്നും മടങ്ങി. തേനി സ്വദേശിയായ കയനിക്കാണ് തിരിച്ചുപോകേണ്ടി വന്നത്. രാവിലെ 6.30 ന് എത്തിയ ഇവര്ക്കെതിരേ തമിഴ്നാടും ആന്ധ്രയും ഉള്പ്പെടെയുള്ള അന്യസംസ്ഥാനത്ത് നിന്നുള്ള ഭക്തര് ഉള്പ്പെട്ട സംഘം പ്രതിഷേധം ഉയര്ത്തുകയായിരുന്നു.
സാരി ധരിച്ച് എത്തിയ ഇവര് ഗാര്ഡ്റൂമില് വസ്ത്രം മാറുന്നതിനിടയിലായില് ഒരു ചെറിയ വിഭാഗം പ്രതിഷേധവുമായി എത്തുകയായിരുന്നു. ഇത് പിന്നീട് വലിയ സംഘമായി മാറിയതോടെ ഇവര് തന്നെ തിരിച്ചുപോകാന് തിരുമാനം എടുക്കുക ആയിരുന്നു. പിന്നീട് ഇവര് പോലീസ് സംരക്ഷണയില് പമ്പയില് നിന്നും മടങ്ങി. പതിവായി ശബരിമലയില് എത്തുന്നയാളാണെന്നും കഴിഞ്ഞ 17 വര്ഷമായി ശബരിമലയില് ദര്ശനത്തിനായി എത്തുന്നയാളാണെന്നും അവര് പറഞ്ഞു. ഭിന്നലിംഗക്കാരെ കയറ്റുവിടാന് തന്ത്രികുടുംബവും പന്തളം കൊട്ടാരവും ദേവസ്വവുമെല്ലാം തീരുമാനം എടുത്തിരുന്നു.
ഇതിന്റെ ഭാഗമായി കഴിഞ്ഞ ദിവസം രണ്ടുപേര് കയറുകയും ദര്ശനം നടത്തുകയും ചെയ്തിരുന്നു. എന്നാല് ഇന്നലത്തെ സംഭവത്തിന്റെ പശ്ചാത്തലത്തില് ഇന്ന് വലിയ പ്രതിഷേധം ഉണ്ടയതോടെ ഇവര് തന്നെ മടങ്ങുകയായിരുന്നു. താന് തിരിച്ചുവരില്ലെന്ന് ഇവര് വ്യക്തമാക്കിയിട്ടുണ്ട്. എന്നാല് ദര്ശനം നടത്താന് ആഗ്രഹിച്ചാല് വേണ്ട സംരക്ഷണം ഇവര്ക്ക് നല്കുമെന്നാണ് പോലീസ് വ്യക്തമാക്കിയിരിക്കുന്നത്.
