പ്യോങ്ഗ്യാങ്: ഉത്തര കൊറിയന് ഭരണാധികാരി കിം ജോങ് ഉന് വീണ്ടും ചൈന സന്ദര്ശിക്കുന്നു. ചൈനീസ് പ്രസിഡന്റ് സി ജിന്പിങിന്റെ ക്ഷണം സ്വീകരിച്ചാണ് കിം ചൈനയിലെത്തിയതെന്ന് ഔദ്യോഗിക മാധ്യമങ്ങള് റിപ്പോര്ട്ട് ചെയ്യുന്നു. ഭാര്യ റി സോള്-ജുവിനൊപ്പം ചൈനയിലെത്തിയ കിം ഈ മാസം 10 വരെ സന്ദര്ശനം തുടരും.
കിമ്മും യു.എസ് പ്രസിഡന്റ് ഡൊണാള്ഡ് ട്രംപുമായി രണ്ടാമതും കൂടിക്കാഴ്ചയ്ക്ക് ഒരുങ്ങുന്നുവെന്ന റിപ്പോര്ട്ടുകള്ക്ക് പിന്നാലെയാണ് ചൈന സന്ദര്ശനം. കഴിഞ്ഞവര്ഷം ജൂണില് ട്രംപും കിമ്മും സിംഗപ്പൂരില് കൂടിക്കാഴ്ച നടത്തിയിരുന്നു.
ഉത്തര കൊറിയയിലെ ഉയര്ന്ന ഉദ്യോഗസ്ഥര്ക്കൊപ്പമാണ് കിം ട്രെയിന്മാര്ഗം ചൈനയില് എത്തിയത്. ഒരു വര്ഷത്തിനിടെ കിം ചൈനയിലേക്ക് നടത്തുന്ന നാലാമത്തെ യാത്രയാണിത്്. ചൈനയുടെ സുപ്രധാന നയതന്ത്ര, വ്യാപാര പങ്കാളിയാണ് ഉത്തര കൊറിയ.
ചൊവ്വാഴ്ച കിമ്മിന്റെ 35ാം ജന്മദിനമാണെന്നും റിപ്പോര്ട്ടുകള് പുറത്തുവരുന്നുണ്ടെങ്കിലും ഉത്തര കൊറിയ ഇത് ഔദ്യോഗികമായി സ്ഥിരീകരിച്ചിട്ടില്ല.
അധികാരത്തിലെത്തി ആദ്യ ആറുവര്ഷങ്ങളില് ചൈനീസ് പ്രസിഡന്റുമായി കൂടിക്കാഴ്ചയ്ക്ക് കിം തയ്യാറായിരുന്നില്ല. എന്നാല് അണ്വായുധ പരീക്ഷണത്തെ തുടര്ന്ന് ഉപരോധം നേരിട്ടതോടെ ചൈനയുമായി അടുത്ത കിം കഴിഞ്ഞ വര്ഷം മൂന്നു തവണ അവിടെയെത്തി.
