ന്യുഡല്ഹി: അലോക് വര്മ്മയെ സി.ബി.ഐ ഡയറക്ടര് സ്ഥാനത്ത് നിന്ന് മാറ്റി. പ്രധാനമന്ത്രി നരേന്ദ്ര മോഡിയുടെ വസതിയില് ചേര്ന്ന സെലക്ഷന് കമ്മറ്റി യോഗത്തിലാണ് തീരുമാനം. സെലക്ഷന് കമ്മറ്റി അധ്യക്ഷനായ പ്രധാനമന്ത്രിയും ചീഫ് ജസ്റ്റിസ് രഞ്ജന് ഗോഗോയിയുടെ പ്രതിനിധിയായി സെലക്ഷന് കമ്മറ്റിയില് പങ്കെടുത്ത ജസ്റ്റിസ് എ.കെ സിക്രിയും അലോക് വര്മ്മയെ മാറ്റുന്നതിനോട് യോജിച്ചു. പ്രതിപക്ഷ പ്രതിനിധിയായ കോണ്ഗ്രസ് ലോക്സഭാ അധ്യക്ഷന് മല്ലികാര്ജുന് ഖാര്ഗെ വിയോജിപ്പ് പ്രകടിപ്പിച്ചു.
കേന്ദ്ര വിജിലന്സ് കമ്മീഷറുടെ അന്വേഷണ റിപ്പോര്ട്ടിന്റെ അടിസ്ഥാനത്തിലാണ് നടപടി. പുറത്താക്കല് എന്നതിലുപരി സ്ഥലം മാറ്റം എന്ന നിലയിലാകും തീരുമാനം നടപ്പിലാക്കുക. റഫാല് ഇടപാടിലടക്കം അലോക് വര്മ്മ സി.ബി.ഐ അന്വേഷണം പ്രഖ്യാപിച്ചേക്കുമെന്ന സൂചനകള്ക്കിടെയാണ് അദ്ദേഹത്തെ പുറത്താക്കിയത്. കഴിഞ്ഞ ഒക്ടോബറില് സി.ബി.ഐ ഡയറക്ടര് സ്ഥാനത്ത് നിന്ന് പുറത്താക്കപ്പെട്ട അലോക് വര്മ്മ സുപ്രീം കോടതിയില് നിന്ന് അനുകൂല വിധി സമ്പാദിച്ച് ഇന്നലെയാണ് സി.ബി.ഐ ഡയറക്ടര് സ്ഥാനത്ത് തിരിച്ചെത്തിയത്.
അലോക് വര്മ്മയെ പുറത്താക്കാന് ഇന്നലെ തന്നെ പ്രധാനമന്ത്രി സെലക്ഷന് കമ്മറ്റി യോഗം വിളിച്ചിരുന്നു. എന്നാല് അദ്ദേഹത്തിനെതിരായ സി.വി.സി അന്വേഷണ റിപ്പോര്ട്ട് കാണണമെന്ന് മല്ലികാര്ജുന് ഖാര്ഗെ ആവശ്യപ്പെട്ടതിനെ തുടര്ന്നാണ് ഇന്നത്തേക്ക് യോഗം മാറ്റിയത്.
പ്രധാനമന്ത്രിയുടെ അടുപ്പക്കാരനായ ജോയിന്റ് ഡയറക്ടര് രാകേഷ് അസ്താനയുമായി കടുത്ത ഭിന്നതയിലായതോടെയാണ് അലോക് വര്മ്മയെ കേന്ദ്രസര്ക്കാര് കഴിഞ്ഞ വര്ഷം പുറത്താക്കിയത്. തുടര്ന്ന് സുപ്രീം കോടതിയില് തിരിച്ചടി നേരിട്ടു. സി.ബി.ഐ ഡയറക്ടര് സ്ഥാനത്ത് തിരിച്ചെത്തിയ അലോക് വര്മ്മ, താല്ക്കാലിക ഡയറക്ടര് നടത്തിയ സ്ഥലം മാറ്റ ഉത്തരവുകള് റദ്ദാക്കുകയും മറ്റ് അഞ്ച് ഉദ്യോഗസ്ഥരെ സ്ഥലം മാറ്റുകയും ചെയ്തിരുന്നു.
