ന്യൂഡല്ഹി: ലോക്സഭാ തെരഞ്ഞെടുപ്പിനു കോണ്ഗ്രസും ബി.ജെ.പിയും ഒരുങ്ങുന്നു. ഇന്നലെ ഡല്ഹിയില് നടന്ന പി.സി.സി. അധ്യക്ഷന്മാരുടെ യോഗത്തില് തെരഞ്ഞെടുപ്പ് ഒരുക്കം വിലയിരുത്തി. തര്ക്കമില്ലാതെ കഴിവതും സീറ്റുകളിലേക്ക് സ്ഥാനാര്ഥി നിര്ണയം പൂര്ത്തിയാക്കാനാണു കോണ്ഗ്രസ് ദേശീയനേതൃത്വത്തിന്റെ നിര്ദേശം. തെരഞ്ഞെടുപ്പ് ഒരുക്കത്തിനായി ബി.ജെ.പി. ദേശീയകൗണ്സില് യോഗം ഇന്നു ഡല്ഹിയില് തുടങ്ങും. രണ്ടുദിവസത്തെ യോഗത്തില് പന്ത്രണ്ടായിരം പ്രതിനിധികള് പങ്കെടുക്കും.
എ.കെ.ആന്റണി അധ്യക്ഷനായ തെരഞ്ഞെടുപ്പുസമിതിയുടെ നേതൃത്വത്തില് നടന്ന പി.സി.സി. അധ്യക്ഷന്മാരുടെ യോഗത്തില് സംസ്ഥാനങ്ങളുടെ ചുമതലയുള്ള എ.ഐ.സി.സി. ജനറല് സെക്രട്ടറിമാരും പങ്കെടുത്തു. സ്ഥാനാര്ഥിനിര്ണയത്തിലെ പിഴവുകളും െവെകലുമാണു പല സീറ്റുകളും നഷ്ടമാകുന്നതിനു കാരണമെന്ന് യോഗം വിലയിരുത്തി. ഇത്തരം തര്ക്കങ്ങള് സംസ്ഥാനതലത്തില് തന്നെ പരിഹരിക്കാനാണ് നിര്ദേശം.
ഇക്കാര്യത്തില് ജില്ലാ നേതൃത്വങ്ങളുടെ അഭിപ്രായവും നിര്ദേശവും പരിഗണിക്കണം. സംസ്ഥാനത്ത് പരിഹാരമായില്ലെങ്കില് മാത്രം തര്ക്കം കേന്ദ്രനേതൃത്വത്തിനു െകെമാറാനുമാണു നിര്ദേശം. അടുത്ത മാസം 20 ന് മുമ്പ് സ്ഥാനാര്ഥിനിര്ണയം പൂര്ത്തിയാക്കാനാണു നിര്ദേശിച്ചിരിക്കുന്നത്.
പൊതുതെരഞ്ഞെടുപ്പു വിജ്ഞാപനം വരുന്നതിനു മുന്പേ സ്ഥാനാര്ഥികളെ കണ്ടെത്തിയാല് പ്രചാരണത്തിന്റെ ആദ്യഘട്ടത്തില് തന്നെ മുന്നിലെത്താനാകുമെന്നു കോണ്ഗ്രസ് നേതൃത്വം കണക്കുകൂട്ടുന്നു. ദേശീയതലത്തില് രൂപീകരിച്ച സമിതികളുടെ മാതൃകയില് പി.സി.സികളുടെ നേതൃത്വത്തില് പ്രചാരണസമിതിയും ഏകോപന സമിതിയും എത്രയും വേഗം രൂപീകരിക്കണം. സംസ്ഥാനതലം മുതല് മണ്ഡലംതലം വരെ ഇത്തരം സമിതികള് രൂപീകരിക്കണമെന്നുമാണ് നിര്ദേശം. അടുത്തമാസം ആദ്യം നടക്കുന്ന ബജറ്റുസമ്മേളനത്തിന് പിന്നാലെ തെരഞ്ഞെടുപ്പ് വിജ്ഞാപനം വരുമെന്നാണു പാര്ട്ടിയുടെ പ്രതീക്ഷ.
ലോക്സഭാ തെരഞ്ഞെടുപ്പിന് തൊട്ടുമുമ്പായി ഇന്നു നടക്കുന്ന ബി.ജെ.പി. ദേശീയ കൗണ്സില് യോഗത്തില് നിര്ണായക തീരുമാനങ്ങളും ചര്ച്ചകളുമുണ്ടാകും. മുത്തലാഖ്ബില്, സാമ്പത്തിക സംവരണ ബില് തുടങ്ങിയവ പ്രയോജനപ്പെടുത്താനും ജി.എസ്.ടി, കാര്ഷികപ്രതിസന്ധി തുടങ്ങിയ വിഷയങ്ങളിലുള്ള പ്രതിപക്ഷപ്രചാരണം പ്രതിരോധിക്കാനുമുള്ള തന്ത്രങ്ങള് ആവിഷ്കരിക്കും.
അയോധ്യാവിഷയം സജീവമായ സാഹചര്യത്തില് കൗണ്സിലിന്റെ പരിഗണന വിഷയമാകും. സുപ്രീം കോടതി വിധി െവെകിയാല് വിഷയത്തില് ഓര്ഡിനന്സ് കൊണ്ടുവരണമെന്നാണ് ആര്.എസ്.എസിന്റെ നിലപാട്. ഈ ആവശ്യമുന്നയിച്ച് ശക്തമായ പ്രക്ഷോഭത്തിനൊരുങ്ങാനാണ് ഹിന്ദു സംഘടനകളുടെ തീരുമാനം. 15 ന് ഉത്തര്പ്രദേശില് തുടങ്ങുന്ന കുംഭമേളയില് ഇക്കാര്യത്തില് തീരുമാനമെടുക്കാനുള്ള നീക്കത്തിലാണ് സന്യാസസമൂഹം. ഇക്കാര്യത്തിലും പാര്ട്ടി നിലപാടെടുത്തേക്കും.
