ന്യൂഡല്ഹി: ഇന്ത്യന് വ്യോമസേന പൈലറ്റ് അഭിനന്ദന് പാക്കിസ്താന്റെ കസ്റ്റഡിയിലെന്ന് സ്ഥിരീകരിച്ച് ഇന്ത്യ. പാക്ക് വിമാനങ്ങള് തുരത്താനുള്ള നീക്കത്തിനിടെ ഇന്ത്യയുടെ മിഗ് 21 വിമാനം തകര്ന്ന് പൈലറ്റ് കാണാനില്ലെന്ന് വിദേശകാര്യ വക്താവ് രവീഷ് കുമാര് നേരത്തെ ഔദ്യോഗികമായി സ്ഥിരീകരിച്ചിരുന്നു.
അതേസമയം പാക്കിസ്താന്റെ പിടിയിലായ അഭിനന്ദിനെ മോശമായ രീതിയില് ചിത്രീകരിക്കുന്ന വീഡിയോകളും ചിത്രങ്ങളും പ്രദര്ശിപ്പിച്ചത് അന്താരാഷ്ട്ര മര്യാദകളുടെ ലംഘനമാണെന്ന് ഇന്ത്യ അറിയിച്ചു. എത്രയും വേഗം ഉദ്യോഗസ്ഥനെ സുരക്ഷിതമായി തിരികെ നല്കണമെന്ന് ഇന്ത്യ പാക്കിസ്താന് താക്കീത് നല്കി. ദേശതാല്പര്യത്തിനുള്ള നടപടി സ്വീകരിക്കാന് ഇന്ത്യയ്ക്ക് അവകാശമുണ്ടെന്നും ഇന്ത്യ വ്യക്തമാക്കി. പൈലറ്റ് പാക്ക് കസ്റ്റഡിയിലായതിനു പിന്നാലെ രക്തം പുരണ്ട മുഖം മൂടിയ കൈകള് ബന്ധിച്ച നിലയില് ഉള്പ്പെടെ നിരവധി ചിത്രങ്ങളും ദൃശ്യങ്ങളും പാക്കിസ്താന് പുറത്തുവിട്ടിരുന്നു. ഇതോടെയാണ് ഇന്ത്യ പാക്കിസ്താന് താക്കീത് നല്കിയത്.
പൈലറ്റ് പിടിയിലായെന്ന അവകാശവാദം പാക്കിസ്താന് ഉന്നയിച്ചതിനു പിന്നാലെ പ്രാകൃതമായ രീതിയില് ഉദ്യോഗസ്ഥനെ പ്രദര്ശിപ്പിക്കുന്ന വീഡിയോയും ചിത്രങ്ങളും പുറത്തുവരുകയും. ഇത് അന്താരാഷ്ട്ര നിയമ ലംഘനമാണെന്ന വിമര്ശനം ഉയര്ന്ന സാഹചര്യത്തില് പൈലറ്റിനെ നല്ല രീതിയില് ചിത്രീകരിച്ചുകൊണ്ടുള്ള വീഡിയോയും പാക്കിസ്താന് പുറത്തുവിട്ടിട്ടുണ്ട്.
പാക്ക് പോര്വിമാനങ്ങളെ തുരത്തുന്നതിനിടയിലാണ് ഇന്ത്യന് വ്യോമസേനയുടെ മിഗ്-21 വിമാനം അതിര്ത്തിയില് തകര്ന്നു വീണത്. അപകടത്തില് നിന്ന് പൈലറ്റ് അഭിനന്ദ് വര്ധന് രക്ഷപ്പെട്ടെങ്കിലും അദേഹം പാക്ക് അധീന കശ്മീരില് ചെന്ന് പതിക്കുകയായിരുന്നു. വൈകുന്നേരത്തോടെ പൈലറ്റ് കസ്റ്റഡിയിലെന്ന സ്ഥിരീകരിച്ച് പാക്ക് പ്രധാനമന്ത്രി ഇമ്രാന് ഖാന് രംഗത്തെത്തി. ഭീകരവാദത്തിനെതിരെ ചര്ച്ചയാകാമെന്നും, ഇന്ത്യയുമായി ചര്ച്ചയ്ക്ക് തയാറാണെന്നും വ്യക്തമാക്കിയിരുന്നു.
