ന്യൂഡല്ഹി: ഇത്തവണയും പ്രധാനമന്ത്രി നരേന്ദ്ര മോഡി വാരണാസിയില് നിന്നു തന്നെ മത്സരിച്ചേക്കുമെന്ന് സൂചന. സ്ഥാനാര്ത്ഥി പട്ടികയ്ക്ക് അന്തിമരൂപം നല്കുന്നതിനായി ബിജെപി കേന്ദ്ര തിരഞ്ഞെടുപ്പ് സമിതി യോഗം ഈയാഴ്ച ചേരാനിരിക്കെ മോഡി മത്സരിക്കുമെന്ന് പ്രതീക്ഷയോടെ കാത്തിരിക്കുന്ന ഒഡീഷയിലെ പുരിയ്ക്ക് നിരാശപ്പെടേണ്ടി വരും. ബിജെപി വക്താവ് സംബിത് പത്ര ഇവിടെ മത്സരിക്കുമെന്നാണ് സൂചന.
ഒഡീഷയില് നിന്ന് മത്സരിക്കുമോ എന്ന ചോദ്യത്തിന് മത്സരിക്കുമെന്നോ ഇല്ലെന്നോ മോഡി പറഞ്ഞില്ലെങ്കിലും ബിജെപി വൃത്തങ്ങളെ ഉദ്ധരിച്ച് എന്ഡിടിവി റിപ്പോര്ട്ട് ചെയ്യുന്നത് പുരിയില് പ്രധാനമന്ത്രി മത്സരിച്ചേക്കില്ലെന്നാണ്. അതേസമയം രണ്ടു സീറ്റിലും മത്സരിച്ചേക്കാനും മതി. 2014ലെ ലോക്സഭ തിരഞ്ഞെടുപ്പില് ഉത്തര്പ്രദേശിലെ വാരണാസിയിലും ഗുജറാത്തിലെ വഡോദ്രയിലുമാണ് മോഡി മത്സരിച്ചത്. രണ്ട് സീറ്റിലും വിജയിക്കുകയും ചെയ്തു. എന്നാല് പിന്നീട് വാരണാസിയെ മാത്രം ഏറ്റെടുത്ത മോഡി വഡോദര ഉപേക്ഷിക്കുകയായിരുന്നു.
ബിജെപി പാര്ലമെന്ററി ബോര്ഡും മോഡി വാരണാസിയില് മത്സരിക്കട്ടെ എന്ന നിലപാടിലാണ്. അതേസമയം പുരിയില് മോഡി മത്സരിച്ചാല് അത് ഒഡീഷയ്ക്ക് പുറമേ ബംഗാളിലും ആന്ധ്രയിലും ബിജെപിയ്ക്ക് ഗുണം ചെയ്യുമെന്ന വിലയിരുത്തല് ബിജെപിയ്ക്ക് ഉണ്ടായിരുന്നു. മോഡി യുപിയില് മത്സരിച്ചതിന് പിന്നാലെ യുപിയിലെ കഴിഞ്ഞ തെരഞ്ഞെടുപ്പുകളിലെല്ലാം ബിജെപി മികച്ച മുന്നേറ്റം ഉണ്ടാക്കിയിട്ടുണ്ട്. 80ല് 71 സീറ്റ് നേടാന് ബിജെപിയെ സഹായിത് മോഡിയുടെ വാരണാസിയിലെ വിജയവും അതിന്റെ ചലനങ്ങളുമാണെന്നാണ് ബിജെപി കരുതുന്നത്.
ബിജെപിയ്ക്ക കാര്യമായ മികവ് കണ്ടെത്താന് കഴിയാത്ത സംസ്ഥാനങ്ങളാണ് ഒഡീഷയും ബംഗാളും. രണ്ടിടത്തും കഴിഞ്ഞ തിരഞ്ഞെടുപ്പുകളില് രണ്ടാം സ്ഥാനം നേടാനേ ബിജെപിക്ക് കഴിഞ്ഞിരുന്നുള്ളൂ. ലോക്സഭാ തിരഞ്ഞെടുപ്പിന്റെ ഏഴാമത്തേയും അവസാനത്തേയും ഘട്ടത്തില് വാരണാസിയില് മേയ് 19നാണ് വോട്ടെടുപ്പ്.
