പത്തനംതിട്ട: കേരളത്തില് നിന്ന് ക്രൈസ്തവരില്ലാത്ത സ്ഥാനാര്ത്ഥി പട്ടിക പ്രധാനമന്ത്രി മോഡി തള്ളിക്കളഞ്ഞുവെന്ന് ബി.ജെ.പി സംസ്ഥാന പ്രസിഡന്റ് ശ്രീധരന്പിള്ളയുടെ വെളിപ്പെടുത്തല്. പത്തനംതിട്ടയിലെ ബി.ജെ.പി സ്ഥാനാര്ത്ഥി കെ. സുരേന്ദ്രന്റെ പാര്ലമെന്റ് തിരഞ്ഞെടുപ്പ് കണ്വന്ഷന് ഉദ്ഘാടനം ചെയ്ത് സംസാരിക്കുകയായിരുന്നു ശ്രീധരന്പിള്ള.
ബി.ജെ.പി സംസ്ഥാന ഘടകം തയ്യാറാക്കിയ ആദ്യ സ്ഥാനാര്ത്ഥി പട്ടികയില് ക്രൈസ്തവ സ്ഥാനാര്ത്ഥികള് ആരുമില്ലായിരുന്നു. ഇതേതുടര്ന്ന് ഈ പട്ടിക പ്രധാനമന്ത്രി തള്ളി. അങ്ങനെയാണ് എറണാകുളത്തെ സ്ഥാനാര്ത്ഥിയായി അല്ഫോണ്സ് കണ്ണന്താനം വന്നതെന്നും ശ്രീധരന്പിള്ള പറഞ്ഞു.
ബി.ജെ.പിയുടെ കേരളത്തിലെ സ്ഥാനാര്ത്ഥി പട്ടികയിലെ അഞ്ച് സ്ഥാനാര്ത്ഥികള് ദുര്ബലരാണെന്ന കോടിയേരിയുടെ ആരോപണത്തിനും ശ്രീധരന്പിള്ള മറുപടി നല്കി. ബി.ജെ.പിയുടെ അഞ്ച് സ്ഥാനാര്ത്ഥികള് ദുര്ബലരാണെന്ന് കോടിയേരി എങ്ങനെ അറിഞ്ഞുവെന്നും ബി.ജെ.പിയുടെ സ്ഥാനാര്ത്ഥികളാരും ദുര്ബലരല്ലെന്നും പിള്ള കൂട്ടിച്ചേര്ത്തു.
