ന്യൂഡല്ഹി: ചീഫ് ജസ്റ്റിസ് രഞ്ജന് ഗോഗോയിക്ക് ക്ലീന് ചിറ്റ് നല്കിയ റിപ്പോര്ട്ടിന്റെ പകര്പ്പ് നല്കണമെന്ന് പരാതിക്കാരി. ഇക്കാര്യം ആവശ്യപ്പെട്ട് സുപ്രീം കോടതിയുടെ ആഭ്യന്തര അന്വേഷണ സമതിക്ക് പരാതിക്കാരി കത്തയച്ചു. ആഭ്യന്തര സമിതി അധ്യക്ഷന് ജസ്റ്റിസ് ബോബ്ഡെയ്ക്കാണ് കത്തയച്ചത്.
ചീഫ് ജസ്റ്റിസ് രഞ്ജന് ഗോഗോയിക്കെതിരെ സുപ്രീം കോടതി മുന് ജീവനക്കാരി ഉന്നയിച്ച പരാതി ഇന്നലെയാണ് മൂന്നംഗ സമിതി തീര്പ്പാക്കിയത്. യുവതിയുടെ ആരോപണത്തില് കഴമ്പില്ലെന്നാണ് മൂന്നംഗ സമിതിയുടെ കണ്ടെത്തല്. ആരോപണത്തിന് തെളിവില്ലെന്നും സമിതി പറയുന്നു. പരാതി തള്ളിയ സമിതി സുപ്രീം കോടതിക്ക് റിപ്പോര്ട്ട് നല്കിയിട്ടുണ്ട്. പരാതി തള്ളിയ സമിതി. അന്വേഷണം അവസാനിപ്പിക്കാനും തീരുമാനിച്ചു.
ഏപ്രില് 20നാണ് ചീഫ് ജസ്റ്റിസിനെതിരായ ലൈംഗികാരോപണം പുറത്തുവന്നത്. സംഭവം സുപ്രീം കോടതി വൃത്തങ്ങള് പുറത്തുവിട്ടിരുന്നില്ല. എന്നാല് ദ വയര് വാര്ത്തയാക്കിയതോടെയാണ് ചീഫ് ജസ്റ്റിസിനെതിരായ ആരോപണം വാര്ത്തയായത്. തുടര്ന്ന് 17 മുതിര്ന്ന ജഡ്ജുമാരെ വിളിച്ചുചേര്ത്ത് ചീഫ് ജസ്റ്റിസ് തന്നെ ഇക്കാര്യം വെളിപ്പെടുത്തി. തുടര്ന്ന് മൂന്നംഗ സമിതിയെ രൂപീകരിച്ച് അന്വേഷണം പ്രഖ്യാപിക്കുകയായിരുന്നു. ചീഫ് ജസ്റ്റിസിന്റെ ഓഫീസിനെ തകര്ക്കാനുള്ള നീക്കമാണ് ആരോപണത്തിന് പിന്നിലെന്നാണ് തുടക്കം മുതല് തന്നെ രജ്ഞന് ഗോഗോയി ആരോപിച്ചിരുന്നത്.
പരാതിക്കാരിയായ യുവതി ആദ്യം അന്വേഷവുമായി സഹകരിച്ചിരുന്നുവെങ്കിലും പിന്നീട് പിന്മാറി. അന്വേഷണ സമിതിയില് വിശ്വാസമില്ലെന്ന് ചൂണ്ടിക്കാട്ടിയായിരുന്നു പിന്മാറ്റം. ഏപ്രില് 30-നാണ് യുവതി പിന്മാറിയത്. തനിക്ക് അഭിഭാഷകനെ നിയമിക്കണമെന്ന ആവശ്യം സമിതി നിരസിച്ചു, തന്റെ മൊഴിപ്പകര്പ്പ് നല്കിയില്ല തുടങ്ങിയ പരാതികള് ഉന്നയിച്ചുകൊണ്ടാണ് യുവതി അന്വേഷണ സംഘവുമായി സഹകരിക്കില്ലെന്ന് വ്യക്തമാക്കിയത്. തുടര്ന്ന് മൂന്നംഗ സമിതി ഏകപക്ഷീയമായി അന്വേഷണം തുടരുകയും പരാതി തള്ളുകയുമായിരുന്നു.
