ശബരിമലയിലെ യുവതി പ്രവേശനവുമായി ബന്ധപ്പെട്ട് റെഡി ടു വെയ്റ്റ് കാമ്പെയ്നുകാരും ആര്എസ്എസ്സുകാരും തമ്മില് സോഷ്യല് മീഡിയയില് വന് തര്ക്കം തുടരുകയാണ്. ശബരിമല ആചാര സംരക്ഷണത്തില് നിന്നും ആര് എസ് എസ്സും ബിജെപിയും പിന്നോട്ട് പോകുന്നുവെന്ന് റെഡി ടു വെയ്റ്റ് കാമ്പെയ്നുകാര് ആരോപിച്ചിരുന്നു.
എന്നാല് ആചാരസമിതിക്ക് റെഡി ടു വെയ്റ്റുകാരുമായി ബന്ധമില്ലെന്നും ശബരിമല പക്ഷോഭത്തില് അവര് തങ്ങള്ക്കൊപ്പമില്ലെന്നും കഴിഞ്ഞ ദിവസം ഹിന്ദു ഐക്യവേദി സംസ്ഥാന അധ്യക്ഷയും ആചാരസംരക്ഷണ സമിതി നേതാവുമായ കെ.പി.ശശികല പറഞ്ഞിരുന്നു. ഇപ്പോള് ഇതിനെതിരെ രംഗത്തെത്തിയിരിക്കുകയാണ് റെഡി ടു വെയ്റ്റ് കാമ്പെയ്ന് നേതൃത്വം നല്കിയ പത്മ പിള്ള.
ശബരിമല പ്രക്ഷോഭത്തില് തങ്ങള് പങ്കെടുത്തില്ല എന്നു പറയാന് ശശികലയ്ക്ക് അധികാരമില്ലെന്ന് പത്മ പിള്ള തുറന്നടിച്ചു. അവരുടെ സംഘടനയെ മാത്രം പരിഗണിക്കുന്നത് സങ്കുചിത മനോഭാവവും രാഷ്ട്രീയവുമാണ്. സന്നിധാനത്ത് വന്നു അറസ്റ്റ് വരിക്കുകയോ കേസില് പ്രതിയാവുകയോ ചെയ്തിട്ടില്ലാത്ത യുവതീ പ്രവേശനത്തെ ആദ്യം മുതല്ക്കെതിര്ത്തവര്ക്ക് പ്രക്ഷോഭവുമായി ബന്ധമില്ലെന്നാണോ പറയുന്നതെന്നും പത്മപിള്ള ചോദിച്ചു.
ഞാനുള്പ്പെടെയുള്ള അയ്യപ്പഭക്തരുടെ വികാരങ്ങളും ആകാംക്ഷയുമൊക്കെ പലരീതിയില് ഉയര്ത്തിക്കാട്ടിയാണ് പ്രക്ഷോഭങ്ങളും ഇലെക്ഷന് പ്രചാരണവുമൊക്കെ നടത്തിയത്. എന്നിട്ട് പ്രക്ഷോഭത്തിലേക്ക് ക്ഷണിച്ചവര്ക്കു മാത്രമേ അതിനെക്കുറിച്ചു പറയാന് പാടുള്ളൂ എന്ന് ഒരു നിയമം ഉണ്ടെന്നറിഞ്ഞില്ലെന്നും പത്മ പിള്ള ഫേസ്ബുക്കില് കുറിച്ചു.
ഇതിനിടെ, റെഡി ടു വെയ്റ്റ് ക്യാംപയിനുമായി ഹിന്ദു ഐക്യവേദി സംസ്ഥാന അധ്യക്ഷ കെ.പി.ശശികലക്കു ബന്ധമുണ്ടായിരുന്നതിന് തെളിവുകള് പുറത്ത് വന്നു. റെഡി റ്റു വെയിറ്റ് ക്യാംപയിനുമായി തനിക്കു ബന്ധമില്ലെന്നായിരുന്നു ശശികല കഴിഞ്ഞദിവസം പറഞ്ഞിരുന്നത്. റെഡി റ്റു വെയിറ്റ് ക്യാംപയിന് ആരംഭിച്ച സമയത്തു ശശികല ഉള്പ്പടെയുള്ളവര് 'I support ready to wait campaign' എന്ന കാര്ഡുമായി നില്ക്കുന്ന പടം അവര് തന്നെയാണ് അവരുടെ ഫേസ്ബുക്കില് പോസ്റ്റ് ചെയ്തിരുന്നത്.
ടൈംസ് ഓഫ് ഇന്ത്യയ്ക്ക് കഴിഞ്ഞ ദിവസം നല്കിയ അഭിമുഖത്തിലാണ് ശശികല റെഡി റ്റു വെയിറ്റ് ക്യാംപയിനെ തള്ളിപ്പറഞ്ഞത്. റെഡി റ്റു വെയിറ്റ് ക്യാംപയിനുമായി ആചാര സംരക്ഷണ സമതിക്ക് ഒരു ബന്ധവുമില്ലെന്നും ശബരിമല പ്രക്ഷോഭത്തില് റെഡി റ്റു വെയിറ്റ് ബിജെപിക്കൊപ്പമല്ലെന്നുമാണ് ശശികല ഇപ്പോള് പറയുന്നത്.
ശശികല ഉള്പ്പടെയുള്ളവര് റെഡി റ്റു വെയിറ്റ് ക്യാംപയിനെ തള്ളിപ്പറഞ്ഞു രംഗത്തെത്താന് കാരണം ലോകസഭാ തെരഞ്ഞെടുപ്പ് അവസാനിച്ചതോടെ ആര് എസ് എസ് നിലപാട് തിരുത്തിയതാണെന്നും സൂചനകളുണ്ട്. ആദ്യം മുതല് തന്നെ ആര് എസ് എസ്സിന് ശബരിമലയില് സ്ത്രീകള് കയറണം എന്ന നിലപാടായിരുന്നു. എന്നാല് പിന്നീട് ഇത് മതവികാരം ആളിക്കത്തിക്കാന് ഉപകരിക്കും എന്ന് കണ്ടു കൊണ്ടാണ് നിലപാട് മാറ്റിയത്.
