തിരുവനന്തപുരം: നിയമസഭാ സമ്മേളനം തുടങ്ങാനിരിക്കെ ചെയര്മാന് സ്ഥാനത്തെ ചൊല്ലിയുള്ള തര്ക്കം കേരളാകോണ്ഗ്രസില് ശക്തമാകുന്നു. പിജെ ജോസഫിനെ മാണിയുടെ പകരക്കാരനായി മുന് നിരയില് ഇരുത്തണമെന്ന് ആവശ്യപ്പെട്ട് കത്ത് നല്കിയ മോന്സ് ജോസഫിനെതിരേ രൂക്ഷ വിമര്ശനവുമായി റോഷി അഗസ്റ്റിന് എംഎല്എ രംഗത്തുവന്നു. പാര്ട്ടിയില് കൂടിയാലോചന ഇല്ലാതെയാണ് മോന്സ് ജോസഫ് സ്പീക്കര്ക്ക് കത്തു നല്കിയതെന്ന് അദ്ദേഹം മാധ്യമങ്ങളോട് പറഞ്ഞു.
കത്ത് ആശയക്കുഴപ്പങ്ങള്ക്ക് ഇടയാക്കിയെന്നും നിയമസഭയിലെ ഇരിപ്പിടത്തെ ചൊല്ലിയല്ല ഇപ്പോഴത്തെ തര്ക്കമെന്നും കക്ഷി നേതാവിനെ ചട്ടപ്രകാരം തെരഞ്ഞെടുക്കാത്തതാണെന്നും റോഷി അഗസ്റ്റിന് പറഞ്ഞു. പാര്ട്ടിക്കുള്ളില് തര്ക്കങ്ങളില്ലെന്നും നടപടിക്രമം അനുസരിച്ച് പാര്ട്ടി ചെയര്മാനെ സംസ്ഥാനകമ്മറ്റി വിളിച്ചു കൂട്ടി തീരുമാനിക്കേണ്ടതുണ്ടെന്നും അദ്ദേഹം പറഞ്ഞു. നിയമസഭയില് മാണിയുടെ സീറ്റില് ഡപ്യൂട്ടി ചെയര്മാനായ പി ജെ ജോസഫ് ഇരിക്കുന്നതില് എതിര്പ്പില്ല. പക്ഷേ ഇക്കാര്യം ആവശ്യപ്പെട്ട് മോന്സ് ജോസഫ് കത്തു നല്കിയത് പാര്ട്ടിക്കുള്ളില് ആലോചനയോ തീരുമാനമോ എടുക്കാതെയാണെന്നും പറഞ്ഞു.
ഇന്ന നിയമസഭാ സമ്മേളനം തുടങ്ങാനിരിക്കെ നിയമസഭാ കക്ഷി നേതാവായി പിജെ ജോസഫ് സ്വയം പ്രഖ്യാപിച്ചതിന് പിന്നാലെ രണ്ടു കത്തുകള് സ്പീക്കര്ക്ക് കിട്ടുകയായിരുന്നു. കെ.എം. മാണി അന്തരിച്ച സാഹചര്യത്തില് നിയമസഭാ കക്ഷിനേതാവെന്ന നിലയില് മുന്നിരയിലുള്ള ഇരിപ്പിടം ഉപനേതാവായ പിജെ ജോസഫിന് നല്കണമെന്നും അതാണ് ചട്ടമെന്നുമായിരുന്നു മോന്സ്ജോസഫ് സ്പീക്കര്ക്ക് കത്തു നല്കിയത്. ഇതിനെ പ്രതിരോധിക്കാന് മാണി വിഭാഗത്തില് നിന്നും ഇതില് നിയമസഭാ കക്ഷി നേതാവിനെ തെരഞ്ഞെടുക്കാന് സാവകാശം നല്കണം എന്നാവശ്യപ്പെട്ട് റോഷി അഗസ്റ്റിനും സ്പീക്കര്ക്ക ്കത്തു നല്കി.
പാര്ട്ടി ചെയര്മാന്റെ അദ്ധ്യക്ഷതയില് ചേരുന്ന യോഗത്തില് മാത്രമേ നിയമസഭാ കക്ഷി നേതാവിനെ തെരഞ്ഞെടുക്കാനാകൂ. ഇതിന് ആദ്യം ചെയര്മാനെ തെരഞ്ഞെടുക്കണം. ഈ കാരണങ്ങളാല് നിയമസഭാ കക്ഷി നേതാവിനെ തെരഞ്ഞെടുക്കാന് സാവകാശം വേണമെന്നാണ് റോഷി അഗസ്റ്റിന്റെ ആവശ്യം. പാര്ട്ടിയിലെ മുതിര്ന്ന നേതാക്കള് തര്ക്കം തുടരുമ്പോള് എംഎല്എ മാരും ഇരുപക്ഷത്തും നിലയുറപ്പിച്ചത് പാര്ട്ടിയിലെ പ്രതിസന്ധി രൂക്ഷമാക്കുന്ന സ്ഥിതയിലാക്കിയിരിക്കുകയാണ്. നിയമസഭാ ബജറ്റ് സമ്മേളനം ഇന്ന് തുടങ്ങാനിരിക്കെ ഇന്ന് കെ. എം. മാണി അനുസ്മരണം മാത്രമായിരിക്കും നിയമസഭയില് നടക്കുക.
