'ക്ഷേത്രത്തില് ഉച്ചപൂജക്ക് ശേഷം ബ്രാഹ്മണര്ക്ക് 'കാല് കഴുകിച്ചൂട്ടല്' നടത്താന് സൗകര്യമുണ്ടാരിക്കുന്നതാണ്. താല്പര്യമുള്ളവര് 500 രൂപ (ഓണപുടവ, ദക്ഷിണ അടക്കം) മുന്കൂട്ടി കൗണ്ടറിലടച്ചു രശീതി വാങ്ങേണ്ടതാണ്.' ഒറ്റപ്പാലത്തുള്ള കൂനന്തുള്ളി മഹാവിഷ്ണു ക്ഷേത്രത്തിലെ പ്രതിഷ്ഠധാദിന മഹോത്സവത്തിലെ നോട്ടീസിലെ വാചകങ്ങളാണ് ഇത്. ക്ഷേത്രത്തിന്റെ ഉത്സവം പ്രമാണിച്ചുള്ള ഈ നോട്ടീസിനെതിരെ വ്യാപക പ്രതിഷേധങ്ങളാണ് ഉയരുന്നത്. ക്ഷേത്രത്തിലെ ഉത്സവത്തോടനുബന്ധിച്ചാണ് ബ്രാഹ്മണരുടെ കാല് കഴുകിച്ചൂട്ട് എന്ന ചടങ്ങ് നടക്കുന്നത്. വിശ്വാസികള് ക്ഷേത്രത്തിലെത്തി, ബ്രാഹ്മണരുടെ കാല്കഴുകി അനുഗ്രഹം വാങ്ങും. തുടര്ന്ന് അവര്ക്ക് ദക്ഷിണയും വസ്ത്രവും നല്കി പൂജിച്ച് അനുഗ്രഹം വാങ്ങുന്നതാണ് ചടങ്ങ്.
ബ്രാഹ്മണരുടെ കാല് കഴികിച്ചൂട്ടുക എന്നാല് 'ബ്രാഹ്മണരുടെ കാല് കഴുകിയ ജലം തീര്ത്ഥമായി ഇതര ജാതിക്കാരായ ഭക്തജനങ്ങള് കുടിക്കുകയും അവരുടെ തലക്കു മേല് തളിക്കുകയും ചെയ്യുന്ന ആരാധാനാചാരമാണ. ഇതിനോടകം നിരവധിപേരാണ് നോട്ടീസിനെ വിമര്ശിച്ച് രംഗത്തെത്തിയിരിക്കുന്നത്. ജൂണ് മൂന്നിന് നടക്കുന്ന ചടങ്ങില് ക്ഷേത്രത്തില് മുന്കൂറായി പണമടച്ച് പങ്കെടുക്കാമെന്ന നോട്ടീസ് വീടുകളിലെത്തിയതോടെയാണ് വിവാദമായത്. ജാതി വ്യവസ്ഥയിലേക്ക് തിരിച്ചുപോകുന്ന ചടങ്ങാണിതെന്ന് നാട്ടുകാര് പറയുന്നു. നവോത്ഥനം ചര്ച്ച ചെയ്യുമ്പോള്, സമൂഹത്തെ പുറകോട്ട് നടത്തുകയാണ് ഇത്തരം ആചാരങ്ങളെന്ന് പുരോഗമന കലാസാഹിത്യ സംഘം ആരോപിച്ചു.
ഇത്തരം സംഭവങ്ങള്ക്കെതിരെ ശക്തമായ പ്രതിരോധം തീര്ക്കുമെന്ന് ഡിവൈഎഫ്ഐയും അറിയിച്ചു. എന്നാല് ഇത് നിര്ബന്ധപൂര്വ്വം നടത്തുന്ന ആചാരമല്ലെന്നാണ് ക്ഷേത്രം ഭാരവാഹികളുടെ വിശദീകരണം. വര്ഷങ്ങളായി നടത്താറുളള ചങ്ങാണിത്. ഇത്തരമൊരു ആചാരം നടത്തണമെന്ന് ക്ഷേത്രകമ്മിറ്റിക്ക് നിര്ബന്ധമില്ലെന്നും വിശ്വാസികളുടെ ആവശ്യപ്രകാരമാണ് ചടങ്ങെന്നുമാണ് ഭാരവാഹികളുടെ വാദം. ഈ ആചാരം അത്യാവശ്യമുള്ളതല്ലെന്നും ക്ഷേത്ര ഭാരവാഹികള് വിശദീകരിക്കുന്നു. നിരവധി ഫേയ്സ്ബുക്ക് പോസ്റ്റുകളും പ്രതിഷേധമറിയിച്ച് ഉയരുന്നുണ്ട്.
ജി.പി രാമചന്ദ്രന്റെ വാക്കുകള് ഉദ്ധരിച്ച് വി.കെ ജോസഫ് ഇതു സംബന്ധിച്ച് ഫേയ്സ്ബുക്കില് കുറിച്ചതിങ്ങനെ,..
ബ്രാഹ്മണരുടെ കാല് കഴുകിയ ജലം തീര്ത്ഥമായി ഇതര ജാതിക്കാരായ ഭക്തജനങ്ങള് കുടിക്കുകയും അവരുടെ തലക്കു മേല് തളിക്കുകയും ചെയ്യുന്ന ആരാധാനാചാരമാണ് കാല് കഴിച്ചൂട്ടല്. അഞ്ഞൂറ് രൂപയാണ് ഇങ്ങിനെ നമ്പൂരാക്കളുടെ കാലുകള് കഴുകുന്ന വെള്ളം കുടിക്കുന്നതിനുള്ള ഫീസ്. (നമ്പൂരി കവിയാണെങ്കില് ഫീസ് കൂടും. ലക്ഷങ്ങളാവും.)
ഈ ആചാരം സുപ്രീം കോടതി നിരോധിച്ചിട്ടില്ല. ഒന്ന് നിരോധിച്ചു കിട്ടിയാല് നാമജപ-കുലസ്ത്രീ-കുഞ്ഞു മാളികപ്പുറം-വട്ടമിട്ടു പറക്കുന്ന കൃഷ്ണ പ്പരുന്തുകള്-ബലിദാനി സമരം നടത്താമായിരുന്നു. മിതവാദ വലതുപക്ഷത്തിന് കൊടി പൂഴ്ത്തി വെച്ച് ആ സമരത്തില് പങ്കു ചേരാം. കൈ നനയാതെ വോട്ടുകള് കുന്നുകൂടും.
ഹായ് എന്തു രസം.'
