കോഴിക്കോട്: മഞ്ചേശ്വരം ഉപതെരഞ്ഞെടുപ്പില് കെ. സുരേന്ദ്രനെ തന്നെ സ്ഥാനാര്ത്ഥിയാക്കാന് ബി.ജെ.പി നീക്കം. മഞ്ചേശ്വരത്ത് മത്സരിക്കില്ലെന്ന സുരേന്ദ്രന്റെ അഭിപ്രായം വ്യക്തിപരമായ അഭിപ്രായമാണെന്ന് ബി.ജെ.പി സംസ്ഥാന അധ്യക്ഷന് പി.എസ് ശ്രീധരന്പിള്ള പറഞ്ഞു. മഞ്ചേശ്വരത്തെ സ്ഥാനാര്ത്ഥി നിര്ണയത്തില് തീരുമാനമായില്ല. സുരേന്ദ്രന് അച്ചടക്കമുള്ള പ്രവര്ത്തകനാണെന്നും പാര്ട്ടി തീരുമാനം അംഗീകരിക്കുമെന്നും ശ്രീധരന്പിള്ള പറഞ്ഞു.
തെരഞ്ഞെടുപ്പില് ശബരിമലയാണ് പ്രധാന വിഷയമായത്. പരാജയം ഉള്ക്കൊണ്ട് നിയമനിര്മ്മാണം നടത്താന് സര്ക്കാര് തയ്യാറാകണം. ശബരിമല വിഷയത്തില് സി.പി.എമ്മിന് തെറ്റ് പറ്റിയെന്ന് സമ്മതിക്കുമോ എന്നും ശ്രീധരന്പിള്ള ചോദിച്ചു.
മഞ്ചേശ്വരം ഉപതെരഞ്ഞെടുപ്പില് മത്സരിക്കാനില്ലെന്ന് സുരേന്ദ്രന് നേരത്തെ വ്യക്തമാക്കിയിരുന്നു. മഞ്ചേശ്വരത്ത് മത്സരിക്കേണ്ടന്ന് നേരത്തെ തീരുമാനിച്ചതാണ്. അതുകൊണ്ടാണ് പത്തനംതിട്ടയില് മത്സരിച്ചത്. പാര്ട്ടിയിലെ മറ്റ് നേതാക്കള്ക്ക് അവസരം കിട്ടാനാണ് താന് മാറിനില്ക്കുന്നതെന്നും സുരേന്ദ്രന് വ്യക്തമാക്കിയിരുന്നു.
2016ലെ നിയമസഭാ തെരഞ്ഞെടുപ്പില് 89 വോട്ടിനാണ് കെ. സുരേന്ദ്രന് മഞ്ചേശ്വരത്ത് പരാജയപ്പെട്ടത്. യു.ഡി.എഫ് സ്ഥാനാര്ത്ഥിയുടെ വിജയം ചോദ്യം ചെയ്ത് സുരേന്ദ്രന് ഹൈക്കോടതിയെ സമീപിച്ചു. ഇതിനിടെ ഷബ്ദുള് റസാഖ് മരിച്ചു. പിന്നാലെ ലോക്സഭാ തെരഞ്ഞെടുപ്പ് പ്രഖ്യാപിച്ചതോടെ സുരേന്ദ്രന് തെരഞ്ഞെടുപ്പ് കേസ് പിന്വലിച്ച് പത്തനംതിട്ടയില് സ്ഥാനാര്ത്ഥിയാവുകയായിരുന്നു.
