ന്യുഡല്ഹി: ലോക്സഭാ തെരഞ്ഞെടുപ്പില് ഏറ്റ വന് തിരിച്ചടിയുടെ പശ്ചാത്തലത്തില് വോട്ടുകള് സംബന്ധിച്ച ബൂത്ത് തല പുനര്ചിന്തനത്തിനൊരുങ്ങി കോണ്ഗ്രസ്. 2019 ലോക്സഭാ തെരഞ്ഞെടുപ്പില് ബൂത്ത് തലം മുതലുള്ള പോളിംഗ് ട്രെന്റുകള് എങ്ങിനെയാണ് വ്യതിചലിച്ചതെന്നും കണക്കുകൂട്ടലുകളില് എവിടെയാണ് പിഴച്ചതെന്നും മനസ്സിലാക്കാനും വിലയിരുത്തല് നടത്താനുമാണ് ഉദ്ദേശം.
ലോക്സഭാ തെരഞ്ഞെടുപ്പില് മത്സരിച്ച എല്ലാ സ്ഥാനാര്ത്ഥികളോടും തെരഞ്ഞെടുപ്പ് കമ്മീഷന് നല്കിയ എല്ലാ സ്ഥാനാര്ത്ഥികള്ക്കും ബൂത്ത് തലത്തില് കിട്ടിയ വോട്ടുകളുടെ വിവരമുള്ള ഫോറം 20 പാര്ട്ടി ആസ്ഥാനത്തേക്ക് അയയ്ക്കാന് ശനിയാഴ്ച ആവശ്യപ്പെട്ടിരിക്കുകയാണ്. ഫോറം ജൂണ് 7 ന് മുമ്പ് കിട്ടണമെന്നാണ് അന്ത്യശാസനം. ഇത്തവണത്തെ വോട്ടിംഗ് ട്രെന്റും മുമ്പത്തെ തെരഞ്ഞെടുപ്പിലെ ട്രന്റും തെരഞ്ഞെടുപ്പും വെച്ചുള്ള ഒരു താരതമ്യ പഠനമാണ് ഉദ്ദേശിക്കുന്നത്.
തെരഞ്ഞെടുപ്പ് രാഷ്ട്രീയത്തില് എവിടെയാണ് പാര്ട്ടി ദുര്ബ്ബലപ്പെട്ടതെന്നും ശക്തിപ്പെടുത്തേണ്ട മേഖലകള് ഏതൊക്കെയാണെന്നും തിരിച്ചറിയാനും പട്ടിക സഹായിക്കുമെന്നാണ് വിലയിരുത്തല്. അതേസമയം തെരഞ്ഞെടുപ്പിന് മുമ്പായി പാര്ട്ടി യൂണിറ്റുകളും സ്ഥാനാര്ത്ഥികളും മുമ്പോട്ട് വെയ്ക്കുന്ന പ്രതീക്ഷകളില് എത്രമാത്രം സത്യമുണ്ടെന്ന് മനസ്സിലാക്കുകയാണ് ബൂത്തുതല വിലയിരുത്തലുകളിലൂടെ ലക്ഷ്യമിടുന്നതെന്നാണ് മറ്റൊരു വാദം.
