ക്വാലലംപൂര്: മലേഷ്യയിലെ ക്വാലലംപൂര് വിമാനത്താവളത്തില് വെച്ച് കൊല്ലപ്പെട്ട ഉത്തരകൊറിയന് ഏകാധിപതി കിം ജോംഗ് ഉന്നിന്റെ അര്ദ്ധ സഹോദരന് കിം ജോംഗ് നാം അമേരിക്കന് ചാരനായിരുന്നെന്ന് റിപ്പോര്ട്ട്. അമേരിക്കന് സെന്ട്രല് ഇന്റലിജന്സ് ഏജന്സിയുടെ ഇടനിലക്കാരനുമായുള്ള കൂടിക്കാഴ്ചയ്ക്കായി എത്തിയപ്പോഴായിരുന്നു ഇദ്ദേഹം കൊല്ലപ്പെട്ടതെന്ന് അമേരിക്കന് ഉദ്യോഗസ്ഥനെ ഉദ്ധരിച്ച് വാള് സ്ട്രീറ്റ് ജേര്ണലാണ് റിപ്പോര്ട്ട് പുറത്തുവിട്ടിരിക്കുന്നത്. ചൈനയ്ക്ക് വേണ്ടിയും ഇയാള് വിവരങ്ങള് കൈമാറിയിരുന്നതായി സംശയിക്കുന്നുണ്ട്.
അമേരിക്കന് രഹസ്യാന്വേഷണ ഏജന്സിയുമായി ബന്ധമുണ്ടായിരുന്നത് പോലെ തന്നെ ചൈനയുടെ സുരക്ഷാ സംവിധാനങ്ങളുടെ ചാരപ്പണിയും നാം ചെയ്തിരുന്നതായി റിപ്പോര്ട്ടില് പറയുന്നുണ്ട്. അതേസമയം വടക്കന് കൊറിയ റിപ്പോര്ട്ടിനോട് പ്രതികരിച്ചിട്ടില്ല. അന്താരാഷ്ട്ര രംഗത്ത് തന്നെ ഏറെ ചര്ച്ച ചെയ്യപ്പെട്ട സംഭവമായിരുന്നു 2017 ല് നടന്ന നാമിന്റെ കൊലപാതകം. മലേഷ്യ വിടാനായി ക്വാലലംപൂര് അന്താരാഷ്ട്ര വിമാനത്തില് കാത്തിരിക്കെ നാമിന്റെ മുഖത്ത് രണ്ടു വിയറ്റ്നാം സ്ത്രീകള് ഒരു സ്പ്രേ അടിക്കുന്നത് വിമാനത്താവളത്തിലെ സിസിടിവി ദൃശ്യങ്ങളില് പതിഞ്ഞിരുന്നു. യുവതികള് ഉടന് തന്നെ അറസ്റ്റ് ചെയ്യുകയും കൊലക്കുറ്റം ചുമത്തി വധശിക്ഷയ്ക്ക് വിധിക്കുകയും ചെയ്തിരുന്നു.
എന്നാല് വടക്കന് കൊറിയ തങ്ങളെ ഇരകളാക്കുകയായിരുന്നു എന്നാണ് യുവതികള് നല്കിയ മൊഴി. ഒരു ടെലിവിഷന് ഷോയാണെന്ന് പറഞ്ഞ് തങ്ങളെ സ്പ്രേയടിക്കാന് കെണിയില് പെടുത്തിയെന്ന് ഇവര് മൊഴി നല്കിയതിനെ തുടര്ന്ന് വിയറ്റ്നാമിലേക്ക് തിരിച്ചയയ്ക്കുകയും ചെയ്തു. ഞരമ്പുകളെ ബാധിക്കുന്ന വി എക്സ് എന്ന രാസായുധമാണ് നാമിനെ കൊല്ലാന് ഉപയോഗിച്ചത്. നാമിന്റെ മരണം ഇരുമ്പു മറയില് കഴിയുന്ന ഉത്തരകൊറിയയുമായി ബന്ധപ്പെട്ട അനേകം കഥകള്ക്ക് കാരണമാകുകയും ചെയ്തിരുന്നു. ട്രംപുമായുള്ള രണ്ടാം ചര്ച്ച പരാജയപ്പെട്ടതിന്റെ പേരില് കിം ജോംഗ് ഉന് നയതന്ത്ര ഉദ്യോഗസ്ഥനെ വധിച്ചതായി കഴിഞ്ഞയാഴ്ചയാണ് റിപ്പോര്ട്ട് പുറത്തുവന്നത്.
