ന്യൂഡല്ഹി: സര്ക്കാര് ഉദ്യോഗസ്ഥനെ ബാറ്റ് കൊണ്ട് അടിച്ച മകനെ ന്യായീകരിച്ച് ബി.ജെ.പി ദേശീയ ജനറല് സെക്രട്ടറി കൈലാഷ് വിജയ്വാര്ഗീയ. വിജയ്വാര്ഗീയയുടെ മകനും ബി.ജെ.പി എം.എല്.എയുമായ ആകാശ് വിജയ്വാര്ഗീയ മുനിസിപ്പല് കോര്പ്പറേഷന് ഉദ്യോഗസ്ഥനെയാണ് ക്രിക്കറ്റ് ബാറ്റ് കൊണ്ട് അടിച്ചത്. ആകാശിന് ശിനിയാഴ്ച ബോപ്പലിലെ പ്രത്യേക കോടതി ജാമ്യം അനുവദിക്കുകയും ചെയ്തു. ജാമ്യത്തിലിറങ്ങിയ ആകാശിനെ പ്രവര്ത്തകര് പൂമാല അണിയിച്ചാണ് സ്വീകരിച്ചത്.
എന്നാല് വന് വിവാദമായ സംഭവം വല്യ കാര്യമാക്കേണ്ടന്നാണ് കൈലാഷ് വിജയ്വാര്ഗീയയുടെ നിലപാട്. തന്റെ മകനെ ന്യായീകരിച്ച വിജയ്വാര്ഗീയ ആക്രമിക്കപ്പെട്ട ഉദ്യോഗസ്ഥനെയും ഒരുപോലെ കുറ്റപ്പെടുത്തുന്നു. തന്റെ മകനും ഐ.എം.സി കമ്മീഷണറുടെയും പരിചയക്കുറവ് പ്രശ്നത്തിന് കാരണമായെന്ന് വിജയ്വാഗീയ പറഞ്ഞു. രണ്ട് പേരും കാര്യങ്ങള് പഠിക്കുകയും ഇത്തരം സംഭവങ്ങള് ആവര്ത്തിക്കാതിരിക്കാന് ശ്രമിക്കുകയും ചെയ്യണമെന്നും വിജയ്വാര്ഗീയ പറഞ്ഞു.
കഴിഞ്ഞ ബുധനാഴ്ചയാണ് സംഭവം നടന്നത്. ആക്രമണം ക്യാമറിയില് കുടുങ്ങിയതാണ് ആക്രമണ സംഭവം പുറത്തറിയാന് കാരണം. ദൃശ്യങ്ങള് പുറത്തുവന്നതോടെ ആകാശിനും മറ്റ് പത്ത് പേര്ക്കുമെതിനെ പോലീസ് കേസെടുക്കുകയായിരുന്നു. ഇയാളെ പ്രാദേശിക കോടതി രണ്ടാഴ്ചത്തേക്ക് റിമാന്ഡ് ചെയ്തിരിക്കെയാണ് ബോപ്പാല് കോടതി ജാമ്യം അനുവദിച്ചത്. ഇന്ഡോര് മൂന്ന് സീറ്റില് നിന്ന് വിജയിച്ചാണ് ആകാശ് എം.എല്.എയായത്.
ഇന്ഡോറിലെ ഗഞ്ചി കോംപൗണ്ടിലെ ചില നിര്മ്മാണങ്ങള് പൊളിക്കുന്നതുമായി ബന്ധപ്പെട്ട തര്ക്കങ്ങളാണ് എം.എല്.എ ഉദ്യോഗസ്ഥനെ ആക്രമിക്കാന് കാരണം. നിരവധി മാധ്യമപ്രവര്ത്തകരുടെ സാന്നിധ്യത്തിലായിരുന്നു ആക്രമണം. സംഭവത്തെ പിന്നീട് ഇയാള് ന്യായീകരിക്കുകയും ചെയ്തു. ഇതൊരു തുടക്കം മാത്രമാണെന്നും ഉദ്യോഗസ്ഥരുടെ അഴിമതിയും ധാര്ഷ്ട്യവും അവസാനിപ്പിക്കുമെന്നുമായിരുന്നു ആകാശിന്റെ പ്രതികരണം. ആദ്യം അപേക്ഷ പിന്നീട് അഭ്യര്ത്ഥന അതിനും ശേഷം അടി എന്നതാണ് തങ്ങളുടെ രീതിയെന്നും ആകാശ് പ്രതികരിച്ചിരുന്നു.
