ലണ്ടന്: ഇന്ത്യയേയും ന്യൂസിലാന്ഡിനേയും തകര്ത്ത് ആതിഥേയരായ ഇംഗ്ലണ്ട് ലോകകപ്പില് സെമി ബെര്ത്ത് ഉറപ്പിച്ചു. ഇതോടെ ഓസ്ട്രേലിയയ്ക്കും ഇന്ത്യയ്ക്കും പുറമെ ഇംഗ്ലണ്ടും സെമിയില് കടന്നതോടെ നാലാം സ്ഥാനക്കാരായി ആരെത്തും എന്നത് മാത്രമാണ് ഇനിയുള്ള ചോദ്യം. ഒയിന് മോര്ഗന് നായകനായ ഇംഗ്ലീഷ് പട 119 റണ്സിന് ന്യൂസിലാന്ഡിനെ തകര്ത്താണ് സെമിബെര്ത്ത് ഉറപ്പിച്ചത്. ഇതോടെ പാക്കിസ്ഥാന്റെ സെമി സ്വപ്നം വീണ്ടും കൂടുതല് തുലാസിലായി.
ഇന്ത്യ-ഇംഗ്ലണ്ട് പോരാട്ടത്തില് ഇന്ത്യ വിജയിച്ചിരുന്നുവെങ്കില് പാക്കിസ്ഥാന്റെ സെമി സാധ്യതകള് കൂടുതല് എളുപ്പത്തിലാക്കുമായിരുന്നു.ഇന്ത്യ പരാജയപ്പെട്ടതോടെ പാക്കിസ്ഥാന്റെ വിധി ന്യൂസിലാന്ഡിനെ ആശ്രയിച്ചായിരുന്നു. ഇംഗ്ലണ്ടിനെതിരെ ന്യൂസിലാന്ഡ് വന് മാര്ജിനില് വിജയം നേടിയിരുന്നുവെങ്കില് പാക്കിസ്ഥാന്റെ സാധ്യതകള് വീണ്ടു തെളിയുമായിരുന്നു. എന്നാല് ഇംഗ്ലണ്ട് വന് മാര്ജിനില് വിജയം നേടിയതോടെ പാക്കിസ്ഥാന്റെ സെമി സ്വപ്നം എത്തിപ്പിടിക്കുന്നതിനും അപ്പുറമായി. ന്യൂസിലാന്ഡ് ഇംഗ്ലണ്ടിനെതിരെ വിജയിക്കുകയും, ബംഗ്ലാദേശിനെതിരെ പാക്കിസ്ഥാന് വിജയം നേടുകയും ചെയ്തിരുന്നുവെങ്കില് പച്ചപ്പട സെമിപ്രവേശം സാധ്യമാകുമായിരുന്നു. ഇംഗ്ലണ്ടിന്റെ കൂറ്റന് വിജയത്തോടെ പാക്ക് സ്വപ്നം വീണ്ടും തകിടം മറിഞ്ഞു.
ബംഗ്ലാദേശിനെതിരായ മത്സരത്തില് പാക്കിസ്ഥാന് മുന്നിലുള്ള സാധ്യതകള് ഇങ്ങനെയാണ്. പാക്കിസ്ഥാന് ആദ്യം ബാറ്റ് ചെയ്യുകയാണെങ്കില് 300 റണ്സ് മാര്ജിനില് ബംഗ്ലാദേശിനെ കീഴടക്കണം. പാക്കിസ്ഥാന് 300 റണ്സ് സ്കോര് ചെയ്താല് ബംഗ്ലാദേശിനെ പൂജ്യത്തിന് പുറത്താക്കണം.
പാക്കിസ്ഥാന് ഒരു 350 റണ്സ് സ്കോര് ചെയ്യുകയും, ബംഗ്ലാദേശിനെ 311 റണ്സിന് കീഴടക്കുകയും ചെയ്യണം. ഇനി പാക്കിസ്ഥാന് 400 റണ്സ് സ്കോര് ചെയ്യാനായാല് 84 നോ, അതിനു താഴെയോ സ്കോറില് ബംഗ്ലാദേശിനെ പുറത്താക്കണം. നിലവില് പാക്കിസ്ഥാന് -0.792 ആണ് നെറ്റ് റണ് റേറ്റ്. ന്യൂസിലാന്ഡിന് +0.175 ആണ്.
