മുംബൈ: ലൈംഗിക ചൂഷണത്തിന് ഇരയാക്കിയെന്ന ബിഹാര് സ്വദേശിനിയുടെ പരാതിയില് ഒടുവില് അന്വേഷണവുമായി സഹകരിക്കാന് തയ്യാറാണെന്ന് വ്യക്തമാക്കി ബിനോയ് കോടിയേരി. ഡി.എന്.എ പരിശോധനയ്ക്ക് തയ്യാറാണെന്നും ബിനോട് കോടതിയില് അറിയിച്ചു. കേസിലെ എഫ്.ഐ.ആര് റദ്ദാക്കണമെന്ന് ആവശ്യപ്പെട്ടാണ് ബിനോയ് ബോംബെ ഹൈക്കോടതിയില് എത്തിയത്. എന്നാല് ബിനോയിയെ പൂട്ടാനുള്ള തെളിവുകളുമായി യുവതിയുടെ അഭിഭാഷകനും കോടതിയില് എത്തിയിരുന്നു. ബിനോയിയും കുട്ടിയുമൊത്തുള്ള ചിത്രങ്ങളും മറ്റു രേഖകളുമാണ് കോടതിയില് സമര്പ്പിച്ചത്. ബിനോയ് ഡി.എന്.എ പരിശോധനയ്ക്ക് തയ്യാറാകണമെന്ന് ആവശ്യപ്പെട്ട് യുവതി കോടതിയെ സമീപിക്കാനിരിക്കേയാണ് ഹൈക്കോടതിയുടെ നിര്ദേശം.
ബിനോയിയുടെ ഹര്ജി പരിഗണിക്കുന്നതിനിടെ, ഡി.എന്.എ പരിശോധനയ്ക്ക് തയ്യാറാകണമെന്ന് ആവശ്യപ്പെട്ട് ബിനോയ്ക്ക് നോട്ടീസ് നല്കിയിട്ടുണ്ടെന്ന് ഓഷ്വാര പോലീസ് അറിയിച്ചു. നേരത്തെ ഡി.എന്.എ പരിശോധന ആവശ്യപ്പെട്ടപ്പോള് ആരോഗ്യപ്രശ്നവും പിന്നീട് ഹൈക്കോടതിയിലെ ഹര്ജിയും ചൂണ്ടിക്കാട്ടി ബിനോയ് ഒഴിഞ്ഞുമാറിയെന്നും പോലീസ് വ്യക്തമാക്കി.
കേസില് മുന്കൂര് ജാമ്യം അനുവദിക്കുന്നതിനുള്ള വ്യവസ്ഥകളില് ഒന്നായിരുന്നു പോലീസ് ആവശ്യപ്പെട്ടാല് ഡി.എന്.എ പരിശോധനയ്ക്ക് തയ്യാറാകണമെന്നത്. ഒരു മാസത്തേക്ക് എല്ലാ തിങ്കളാഴ്ചയും ഓഷ്വാര പോലീസ് സ്റ്റേഷനില് ഹാജരാകണമെന്നും വ്യവസ്ഥയുണ്ട്.
