തിരുവനന്തപുരം : അമ്പൂരി രാഖി കൊലപാതകത്തില് പുറത്തു വരുന്നത് നിര്ണ്ണായക വിവരങ്ങള്. മുഖ്യപ്രതി അഖിലിന്റെ വീട്ടില് പോലീസ് ഇന്നു നടത്തിയ പരിശോധനയില് വിഷം കണ്ടെത്തി. രാഖിയുടെ കൊലപാതകത്തെ തുടര്ന്ന് കുടുംബത്തില് ആകെ അസ്വസ്ഥതയായിരുന്നുവെന്നും ഇതേതുടര്ന്ന് കുടുംബത്തോടെ ജീവനൊടുക്കാന് ശ്രമിച്ചിരുന്നുവെന്നും അഖില് പറഞ്ഞു.
കൊലപാതകം കഴിഞ്ഞുള്ള ദിവസങ്ങളില് വീട്ടില് അഖില് അസ്വസ്ഥനായിരുന്നു. പോകുന്നതിന് മുന്പ് അഖില് എല്ലാം വീട്ടുകാരോട് പറഞ്ഞിരുന്നു. ഇതേതുടര്ന്നാണ് ജൂലൈ 20 ന് അഖിലിനെ വീട്ടുകാര് തിരികെ വിളിപ്പിച്ചത്. വിഷം വാങ്ങിവെച്ച് കുടുംബത്തോടെ ജീവനൊടുക്കാനും തീരുമാനിച്ചിരുന്നു.
രാഖിയുടെ മൃതദേഹം ഡാമില് ഉപേക്ഷിക്കാന് പ്രതികള് പദ്ധതി ഇട്ടിരുന്നുവെന്നാണ് പുതിയ വിവരം. അണക്കെട്ടില് ഉപേക്ഷിക്കാന് കഴിഞ്ഞില്ലെങ്കില് തമിഴ്നാട്ടില് കൊണ്ടുപോയി ചതുപ്പില് കെട്ടിത്താഴ്ത്താനും പദ്ധതി ഇട്ടിരുന്നു.
എന്നാല്, മൃതദേഹവുമായി അത്രയും ദൂരം യാത്ര ചെയ്യുന്നത് അപകടമാണെന്ന് തോന്നിയതോടെയാണ് കുഴിച്ചിടാന് തീരുമാനിച്ചത്. അഖിലിന്റെ സൈന്യത്തിലെ ജോലി പോകാതിരിക്കാനായി രണ്ടാം പ്രതി രാഹുലാണ് കൊലപാതകക്കുറ്റം ഏറ്റെടുക്കാനിരുന്നത്. എന്നാല്, കൂട്ടുപ്രതി ആദര്ശ് പിടിയിലായതോടെ ആ നീക്കം പൊളിയുകയായിരുന്നു.
അതേസമയം, അഖിലിന്റെ മാതാപിതാക്കള്ക്ക് കൊലപാതകത്തില് പങ്കുണ്ടോ എന്ന കാര്യത്തിന് തെളിവുകള് ലഭിച്ചിട്ടില്ല. ഇത് അന്വേഷിച്ചു വരികയാണെന്നും പോലീസ് പറഞ്ഞു.
