ജബല്പൂര്: ചേച്ചിയുടെ ഭര്ത്താവുമായി പ്രണയത്തിലായ അനുജത്തി കാമുകനെ സ്വന്തമാക്കാന് ഗര്ഭിണിയായ സഹോദരിയെ കുത്തിക്കൊന്നു. മദ്ധ്യപ്രദേശിലെ ജബല്പൂരില് നടന്ന സംഭവത്തില് 19 കാരിയാണ് കൃത്യം നടത്തിയത്. സഹോദരി ഭര്ത്താവുമായി ദീര്ഘകാലമായി പ്രണയത്തിലായിരുന്ന ശതാക്ഷി രജപുത്ത് എന്ന പെണ്കുട്ടി മൂത്ത സഹോദരി അഭിലാഷയെയാണ് കത്തിക്കിരയാക്കിയത്.
ജബല്പൂരിലെ ഷഹന്പൂര് നഗരത്തില് ജൂലൈ 27 നായിരുന്നു സംഭവം. രണ്ടു പേരും മാത്രം വീട്ടിലുണ്ടായിരുന്ന ദിവസം ഇര വാഷ്റൂമിലേക്ക് കയറിയപ്പോള് പിന്നാലെ ചെന്ന ശതാക്ഷി കഴുത്തിലും വയറ്റിലും കുത്തുകയായിരുന്നു. കുത്തേറ്റ അഭിലാഷ ബാത്ത്റൂമിലെ തറയില് കുഴഞ്ഞുവീണു. ബഹളം കേട്ട് ഓടിയെത്തിയ നാട്ടുകാര് അഭിലാഷയെ ഉടന് ആശുപത്രിയില് എത്തിച്ചെങ്കിലും മരണമടയുകയായിരുന്നു. സഹോദരിക്ക് മേല് ശതാക്ഷി നടത്തുന്ന മൂന്നാമത്തെ ശ്രമമാണ് ഇതെന്ന് പോലീസ് പറഞ്ഞു. സംഭവത്തില് പോലീസ് അന്വേഷണം തുടങ്ങിയിട്ടുണ്ട്.
ചോദ്യം ചെയ്യലില് ശതാക്ഷി കുറ്റം സമ്മതിച്ചു. കൊലപാതകത്തിന് ശേഷം മുഖം മറച്ച് രക്ഷപ്പെടാന് ശ്രമിച്ച ശതാക്ഷിയെ നാട്ടുകാര് കണ്ടിരുന്നു. ഇവര് പെട്ടെന്ന് തന്നെ പോലീസിനെ വിളിക്കുകയും മൊബൈല്ഫോണ് ലൊക്കേഷന് കേന്ദ്രീകരിച്ച് പോലീസ് ശതാക്ഷിയെ പിടികൂടുകയുമായിരുന്നു. 27 കാരിയായ അഭിലാഷയുടെ ഭര്ത്താവാണ് ശതാക്ഷിയുടെ ഫോണ് നമ്പര് പോലീസിന് കൊടുത്തത്.
സഹോദരീ ഭര്ത്താവിനൊപ്പം ജീവിക്കാന് വേണ്ടിയാണ് ചേച്ചിയെ കൊന്നതെന്ന് ഇവര് പോലീസിനോട് പറഞ്ഞു. മുമ്പ് ഒരു ദിവസം രാത്രിയിലും പിറ്റേന്ന് പകലും ചേച്ചിയെ കൊല്ലാന് ശ്രമിച്ചെങ്കിലും ശ്രമം പരാജയപ്പെടുകയായിരുന്നു എന്നും ഇവര് പോലീസിന് നല്കിയ മൊഴിയില് പറയുന്നു. കുത്താനുപയോഗിച്ച കത്തിയും ഈ സമയത്ത് ഉപയോഗിച്ച വസ്ത്രങ്ങളും പോലീസ് പിന്നീട് കണ്ടെടുത്തു.
