തിരുവനന്തപുരം : മാധ്യപ്രവര്ത്തകനെ കാറിടിച്ച് കൊന്ന സംഭവത്തില് പ്രതിയായ ശ്രീറാം വെങ്കിട്ടരാമന് ജാമ്യം ലഭിച്ചത്് പൊലീസിന്റെ ഗുരുതര വീഴ്ച്ചമൂലമെന്ന് പ്രതിപക്ഷ നേതാവ് രമേശ് ചെന്നിത്തല. കേസില് സര്ക്കാര് തലത്തിലുള്ള ഉന്നതര് ഇടപെടുന്നുവെന്ന ആരോപണം ശരിവെക്കുന്നതാണ് ശ്രീറാമിന്റെ ജാമ്യം എന്നും ചെന്നിത്തല പറഞ്ഞു.
കേസില് തുടക്കം മുതലെ തെളിവുകള് ശേഖരിക്കുന്നതില് പോലീസ് വലിയ വീഴ്ച വരുത്തിയെന്നും ചെന്നിത്തല ആരോപിച്ചു. ശ്രീറാമില് നിന്നും രക്തസാമ്പിളുകള് പോലും എടുക്കാന് പോലീസ് തയ്യാറായില്ലെന്ന് അദ്ദേഹം ചൂണ്ടിക്കാട്ടി.
പോലീസിന്റെ ഭാഗത്ത് നിന്നും ഉണ്ടായ ഈ വീഴ്ച്ചകള് മനപൂര്വ്വമാണെന്ന് തെളിയിക്കുന്ന വിധിയാണ് ഇപ്പോള് പുറത്ത് വന്നിരിക്കുന്നത്. വീഴ്ചകള് പലതും മാധ്യമങ്ങള് ചൂണ്ടിക്കാട്ടിയിട്ട് പോലും അത് തിരുത്താന് പോലും ബന്ധപ്പെട്ട അധികൃതര് തയ്യാറായില്ലെന്നും ചെന്നിത്തല വിവരിച്ചു. മുഖ്യമന്ത്രിയും പ്രതികരിച്ചില്ല. ഇതെല്ലാം കാരണം പ്രതിക്ക് എളുപ്പത്തില് ജാമ്യം കിട്ടിയതെന്നും അദ്ദേഹം പറഞ്ഞു.
സര്ക്കാരിന് ഇഛാശക്തിയുണ്ടെങ്കില് കേസ് അട്ടിമറിച്ചവരെ നിയമത്തിന് മുന്നില് കൊണ്ടുവരികയാണ് വേണ്ടത്. മുഖ്യമന്ത്രി തുടക്കത്തില് പറഞ്ഞത് ഈ കേസില് എത്ര ഉന്നതരായാലും നടപടിയെടുക്കുമെന്നാണ്, ഇനിയെങ്കിലും കേസ് നടത്തിപ്പില് സര്ക്കാര് അലംഭാവം കാണിക്കരുതെന്നും രമേശ് ചെന്നിത്തല ആവശ്യപ്പെട്ടു.
