തിരുവനന്തപുരം : പോലീസ് കോണ്സ്റ്റബള് പി എസ്സി പരീക്ഷയില് റാങ്ക് ജേതാവായ നസീമിന്റെ പ്രൊഫൈല് പരിശോധനയില് പി എസ് സി ക്ക് ഗുരുതര വീഴ്ച്ചയെന്ന് കണ്ടെത്തല്. രണ്ട് പ്രൊഫൈലുകള് ഉപയോഗിച്ചാണ് നസീം പി എസ് സി പരീക്ഷയ്ക്ക് അപേക്ഷിച്ചത്. യൂണിവേഴ്സിറ്റി കോളേജിലെ മുന് എസ് എഫ് ഐ യൂണിറ്റ് സെക്രട്ടറിയായിരുന്നു നസീം.
ഒരാള്ക്ക് രണ്ട് പ്രെഫൈലുകളില് നിന്നും പി എസ് സി റജിസ്ട്രേഷന് ചെയ്യുന്നത് പി എസ് സി നിയമ പ്രകാരം ഡീബാര് ചെയ്യേണ്ട തട്ടിപ്പാണ്. ഇങ്ങനെ തട്ടിപ്പ് നടത്തി ഡീബാര് ചെയ്യുന്ന ആളുകളുടെ പട്ടികയും പട്ടികയും പി എസ് സി വര്ഷാവര്ഷം വെബ്സൈറ്റില് പ്രസിദ്ധീകരിക്കാറുണ്ട്. എന്നാല് നസീമിന്റെ കാര്യത്തില് പരിശോധന ഉണ്ടായില്ലെന്ന് മാത്രമല്ല യൂണിവേഴ്സിറ്റി കോളേജില് നടത്തിയ അക്രമം പോലും നസീമിന് പ്രശ്്നമായില്ല.
പി എസ് സി പരീക്ഷയില് ശിവരഞ്ജത്തിനും നസീമിനും പ്രണവിനും കിട്ടിയ ചോദ്യപ്പേപ്പര് ഒരേ കോഡിലുള്ളതായിരുന്നു. ഇതിലും ദുരൂഹതയുണ്ട്. കോഡ് സി ചോദ്യപ്പേപ്പറുകളാണ് ഇവര്ക്ക് മൂന്ന് പേര്ക്ക് ലഭിച്ചത്. ഈ ചോദ്യപേപ്പറിലെ ക്രമത്തിലുള്ള ഉത്തരങ്ങള് പുറത്തു നിന്ന് മൊബൈല് ഫോണില് മൂവര്ക്കും എത്തിയതായാണ് പിഎസ്സി വിജിലന്സിന്റെ തന്നെ കണ്ടെത്തല്.അങ്ങനെയെങ്കില് മൂവര്ക്കും ഒരേ കോഡ് ലഭിച്ചതിന് പിന്നില് എവിടെയാണ് ഒത്തുകളി നടന്നതെന്നും കൂടി ചോദ്യമുയരുമ്പോള് കേരള പബ്ലിക് സര്വ്വീസ് കമ്മീഷന് സംശയത്തിന്റെ മുനയിലാണ്.
ഇരട്ട പ്രൊഫൈലുള്ളവര് ആളുമാറി രണ്ടാം ഹാള്ടിക്കറ്റില് പരീക്ഷ എഴുതുന്നു എന്ന് കണ്ടെത്തിയതോടെയാണ് ഇരട്ടപ്രൊഫൈല് കുറ്റമാക്കിയത്. നസീമിന്റെ കാര്യത്തില് പിഎസ്സി അറിഞ്ഞിട്ടും കണ്ണടച്ചതാണോ, അതോ കബളിപ്പിക്കപ്പെട്ടതോ എന്നാണ് ഇനി അറിയേണ്ടത്. എന്തായാലും ഇതില് നിന്ന് പിഎസ്സിക്ക് ഒഴിഞ്ഞുമാറാനാകില്ല.
