മലപ്പുറം: മലപ്പുറം നിലമ്പൂര് കവളപ്പാറയില് ഉരുള്പ്പൊട്ടലില് കാണാതായവരില് നാലു മൃതദേഹങ്ങള് കൂടി കണ്ടെത്തി. ഇതോടെ ദുരന്തത്തില് മരിച്ചവരുടെ എണ്ണം 37 ആയി. കവളപ്പാറയില് നിന്ന് ഇനിയും 22 പേരെ കൂടിയാണ് കണ്ടെത്താനുള്ളത്. മഴക്കെടുതികളില് ഇതുവരെ മരണം 111 ല് എത്തി. വിവിധ അപകടങ്ങളില് സംസ്ഥാനത്ത് 31 പേരെ കാണാതായിട്ടുണ്ടെന്നും മുഖ്യമന്ത്രി പിണറായി വിജയന് അറിയിച്ചു.
സംസ്ഥാനത്ത് 891 ക്യാമ്പുകളിലായി 1,47,286 പേര് ഇപ്പോഴും വിവിധ ദുരിതാശ്വാസ ക്യാമ്പുകളിലുണ്ടെന്നും മുഖ്യമന്ത്രി വ്യക്തമാക്കി. വെള്ളിയാഴ്ച വൈകിട്ട് മൂന്ന് മണി വരെയുളള കണക്കാണിത്. മഴക്കെടുതികളില് 1,116 വീടുകളാണ് പൂര്ണമായും തകര്ന്നിട്ടുള്ളത്. 11,935 വീടുകള് ഭാഗികമായും തകര്ന്നിട്ടുണ്ട്.
ഏറ്റവും കൂടുതല് ആളുകള് മരിച്ചത് മലപ്പുറം ജില്ലയിലാണ്. 48 പേരാണ് മലപ്പുറത്ത് മാത്രം മരണപ്പെട്ടത്. കോഴിക്കോട് ജില്ലയില് 17 പേരും വയനാട്ടില് 12 പേരുമാണ് മരണപ്പെട്ടത്. വയനാട്ടില് വന് ദുരന്തം ഉണ്ടായ പുത്തുമലയില് നിന്ന് ഇനിയും ഏഴുപേരെ കണ്ടെത്താനുണ്ട്. കണ്ണൂരില് ഒന്പത് പേര് മരിച്ചു. തിരുവനന്തപുരം, കൊല്ലം, പത്തനംതിട്ട, എറണാകുളം ജില്ലകളില് പ്രളയക്കെടുതികളില് ആര്ക്കും ജീവന് നഷ്ടമായിട്ടില്ല.
