കൊല്ലം: വനം വകുപ്പ് മന്ത്രി കെ രാജുവിന്റെ പ്രത്യേക പ്രദേശിക വികസന ഫണ്ട് ഉപയോഗിച്ച് നിര്മ്മിച്ച വെയിറ്റിംഗ് ഷെഡ് സോഷ്യല് മീഡിയയില് ചര്ച്ചയാകുന്നു. മന്ത്രിയുടെ മണ്ഡലമായ പുനലൂരിലാണ് സംഭവം. എന്നാല് സംഭവത്തെ കുറിച്ച് പ്രതികരിക്കാന് മന്ത്രി തയ്യാറായിട്ടില്ല. പുനലൂരില് നിന്നും തെന്മല പോകുന്ന വഴി താഴെ പ്ലാച്ചേരിക്ക് സമീപം താമരപ്പിള്ളിയില് നിര്മ്മിച്ചിരിക്കുന്ന വെയ്റ്റിംഗ് ഷെഡിന്റെ ചിത്രമാണ് പ്രചരിക്കുന്നത്. താമരപ്പിള്ളി ക്ഷേത്രത്തിന്റെ സ്റ്റോപ്പാണിത്.
അഞ്ചു കമ്പികളും ഒരു കൂരയുമുപയോഗിച്ച് നിര്മ്മിച്ച വെയ്റ്റിംഗ് ഷെഡ്ഡിന് നാലു ലക്ഷം രൂപയാണ് അടങ്കല് തുകയായി കാണിച്ചിരിക്കുന്നത്. പ്രളയത്തില് വീടു നഷ്ടപ്പെട്ടവര്ക്കും ഇതേ നാലു ലക്ഷം രൂപയല്ലെ എന്നതാണ് സോഷ്യല്മീഡിയ ചൂണ്ടിക്കാട്ടുന്നത്. ഇത്തരമൊരു സ്റ്റോപ്പിന്റെ ആവശ്യം ഇല്ലെന്നാണ് പ്രദേശവാസികളുടെ പ്രതികരണം. കൂടാതെ നാല് ലക്ഷം ചെലവാക്കാനിടയില്ലെന്നും ആരോപണങ്ങള് ഉയരുന്നു.
പുതിയ വെയിറ്റിംഗ് ഷെഡിന്റെ എതിര്വശത്ത് എന്.കെ പ്രേമചന്ദ്രന് എം.പി ഫണ്ട് ഉപയോഗിച്ചു നിര്മ്മിച്ച മൂന്നുലക്ഷം രൂപയുടെ വക ബസ് സ്റ്റോപ്പ് വര്ഷങ്ങളായി സ്ഥിതിചെയ്യുന്നുണ്ട്. ഇതിനു പുറമെയാണ് ഒരാഴ്ചമുന്പ് പുതിയ ബസ്റ്റോപ്പിന്റെ നിര്മ്മാണവും പൂര്ത്തിയായത്. മൂന്നുമാസം കൊണ്ടാണ് നിര്മ്മാണം ആരംഭിച്ചതും പൂര്ത്തിയായതും.
