പട്ന : ബീഹാറില് പ്രായപൂര്ത്തിയാകാത്ത പെണ്കുട്ടിയെ തട്ടികൊണ്ടുപോയി ആറ് പേര് ചേര്ന്ന് ബലാത്സംഗം ചെയ്തു. ഓഗസ്റ്റ് 14 നാണ് പെണ്കുട്ടിയെ തട്ടിക്കൊണ്ട് പോകുന്നത്. പിന്നീട് ഗയ ജില്ലാ പഞ്ചായത്ത് കെട്ടിടത്തിന്റെ മുകളില് വെച്ച് ഇവര്
ആറ് പേര് ചേര്ന്ന് പെണ്കുട്ടിയെ പീഡിപ്പിക്കുകയായിരുന്നു. ഇന്ത്യ ടുഡേയാണ് ഇക്കാര്യം റിപ്പോര്ട്ട് ചെയ്തത്.
കെട്ടിടത്തിന്റെ മുകളില് വെച്ച് കുട്ടിയുടെ ബോധം പോകും വരെ ഇവര് മാറി മാറി ബലാല്സംഗം ചെയ്യുകയായിരുന്നു. അടുത്ത ദിവസം രാവിലെ പ്രദേശവാസിയായ ഒരാളാണ് പെണ്കുട്ടിയെ കെട്ടിടത്തിന് മുകളില് കണ്ടത്. തുടര്ന്ന് ഇയാള് കുട്ടിയുടെ മാതാപിതാക്കളെ വിവരമറിയിക്കുകയായിരുന്നു.
എന്നാല് പഞ്ചായത്ത് സമിതിയില് സ്വാധീനമുണ്ടായിരുന്ന പ്രതികള് ശിക്ഷാ പെണ്കുട്ടിക്ക് വിധിച്ചു. പീഡനത്തില് അതിജീവിച്ച പെണ്കുട്ടിയെ തല മൊട്ടയടിച്ച് റോഡിലൂടെ നടത്തി.
പിന്നീട് പെണ്കുട്ടിയും അമ്മയും ഉയര്ന്ന പൊലീസ് ഉദ്യോഗസ്ഥര്ക്ക് പരാതി നല്കി. സംഭവം നടന്ന് 11 ദിവസങ്ങള്ക്ക് ശേഷമാണ് പൊലീസ് എഫ്ഐആര് രജിസ്റ്റര് ചെയ്തത്. കേസില് ഉള്പ്പെട്ട ആറുപേരെ ഇതുവരെ കസ്റ്റഡിയിലെടുത്തെന്നാണ് വനിതാ പൊലീസ് സ്റ്റേഷന്റെ ചുമതലയുള്ള ഉദ്യോഗസ്ഥ അറിയിച്ചത്.
പെണ്കുട്ടിക്ക് ശിക്ഷ വിധിച്ച അഞ്ച് പഞ്ചായത്ത് അംഗങ്ങള്ക്കെതിരെ പോക്സോ ചുമത്തി കേസ് രജിസ്റ്റര് ചെയ്ത് കസ്റ്റഡിയിലെടുത്തു. ആറംഗ സംഘത്തിലെ ഒരാളെ അറസ്റ്റ് ചെയ്യുകയും ചെയ്തു. സംഭവത്തില് സ്വമേധയാ കേസെടുത്ത ബിഹാര് വനിതാ കമ്മീഷന് ഗയ പൊലീസ് സൂപ്രണ്ടിന് നോട്ടീസ് അയച്ചു. എല്ലാ പഞ്ചായത്ത് അംഗങ്ങളും സെപ്റ്റംബര് രണ്ടിനകം ഹാജരാകാനും വനിതാ കമ്മീഷന് നിര്ദ്ദേശം നല്കിയിട്ടുണ്ട്.
