തിരുവനന്തപുരം: യൂണിവേഴ്സ്റ്റി കോളജിലെ എസ്.എഫ്.ഐ നേതാക്കളുടെ ആക്രമണം കൃത്യമായ ആസൂത്രണത്തോടെയായിരുന്നുവെന്ന് ആക്രമണത്തിന് ഇരയായ അഖില്. എസ്.എഫ്.ഐ യൂണിറ്റ് കമ്മിറ്റി ചേര്ന്നാണ് തന്നെ ആക്രമിക്കാന് തീരുമാനിച്ചത്. യൂണിറ്റ് നേതാക്കളെ എതിര്ത്തതാണ് ആക്രമണത്തിന് കാരണമെന്നും അഖില് പറഞ്ഞു. എസ്.എഫ്.ഐ നേതാക്കളുടെ കുത്തേറ്റ് ചികിത്സയിലായിരുന്ന അഖില് ആദ്യമായി മാധ്യമങ്ങളോട് പ്രതികരിക്കുകയായിരുന്നു.
നേതൃത്വത്തെ എതിര്ത്തതിന്റെ പേരില് തന്നോടും സുഹൃത്തുക്കളോടും അവര്ക്ക് വ്യക്തിവൈരാഗ്യമുണ്ടായിരുന്നു. ഇതിന്റെ പേരിലാണ് ആക്രമണം. കോളജില് എസ്.എഫ്.ഐയുടെ ഇടിമുറിയുണ്ട്. തന്നെ ഉള്പ്പെടെ പലരേയും അവിടെ കൊണ്ടുപോയി മര്ദ്ദിച്ചിട്ടുണ്ട്. ഇടിമുറി പേടിപ്പിക്കുന്ന അനുഭവമാണ്. നസീം ശിവരഞ്ജിത്തും ഉള്പ്പെടെയുള്ളവര് നിരന്തരം മര്ദ്ദിച്ചിരുന്നു.
സി.പി.എം നേതാക്കള് ഇടപെട്ടിട്ടുപോലും എസ്.എഫ്.ഐ നേതാക്കള് വഴങ്ങിയിരുന്നില്ല. ചികിത്സയിലായിരിക്കേ സി.പി.എം തനിക്ക് എല്ലാ പിന്തുണയും നല്കി. എസ്.എഫ്.ഐ നടത്തിയ ആക്രമണത്തെ കുറിച്ച് പാര്ട്ടിക്ക് അറിവുണ്ടായിരുന്നില്ല. കുത്തേറ്റ സംഭവത്തില് നിയമ നടപടികളുമായി മുന്നോട്ടുപോകും. കോളജിലെ സംഭവം ഒരുതരത്തിലും അംഗീകരിക്കാന് കഴിയാത്തതാണെന്നും അഖില് പറഞ്ഞു.
