വലിയ ചര്ച്ചകള്ക്കും ഊഹാപോഹങ്ങള്ക്കും ഒടുവിലാണ് പാലാ ഉപതെരഞ്ഞെടുപ്പിനുള്ള യുഡിഎഫ് സ്ഥാനാര്ത്ഥിയെ പ്രഖ്യാപിച്ചത്. ജോസ് ടോം പാലക്കുന്നേലിനെയാണ് സ്ഥാനാര്ത്ഥിയായി യുഡിഎഫ് നേതൃത്വം പ്രഖ്യാപിച്ചത്. ജോസ് കെ മാണിയുടെ ഭാര്യ നിഷ ജോസ് കെ മാണി മത്സരിക്കുമെന്നായിരുന്നു വിവരം. എന്നാല് നിഷ മത്സരിച്ചാല് ചിഹ്നം നല്കില്ലെന്ന പിജെ ജോസഫിന്റെ കടും പിടുത്തമാണ് ജോസ് ടോം പാലക്കുന്നേലില് എത്തി നില്ക്കുന്നത്. ഈ സംഭവത്തില് പ്രതികരണവുമായി രംഗത്തെത്തിയിരിക്കുകയാണ് രാഷ്ട്രീയ നിരീക്ഷകനും അഭിഭാഷകനുമായ എ ജയശങ്കര്.
നിഷയുടെ വരവു കാത്തിരുന്ന രാഷ്ട്രീയ കേരളം നിരാശയിലാണ്ടു പോയെന്ന് ജയശങ്കര് ഫേസ്ബുക്കില് കുറിച്ചു..
ഫേസ്ബുക്ക് പോസ്റ്റിന്റെ പൂര്ണരൂപം;
ഒടുവില് വെളളപ്പുക വന്നു. പാലായില് ജോസ് ടോം യുഡിഎഫ് സ്ഥാനാര്ഥി. നിഷയുടെ വരവു കാത്തിരുന്ന രാഷ്ട്രീയ കേരളം നിരാശയിലാണ്ടു പോയി.
കേരള രാഷ്ട്രീയത്തിലും കേരള കോണ്ഗ്രസിലും മഹാനായ മാണി സാറിന്റെ ലെഗസി കാത്തു സൂക്ഷിക്കാന് നിഷാ ജോസ് മാണിയായിരുന്നു ഏറ്റവും മികച്ച സ്ഥാനാര്ഥി. ബുദ്ധിയും വിവേകവും സൗന്ദര്യവും സാമര്ത്ഥ്യവും ഒത്തിണങ്ങിയ ഒന്നാന്തരം സ്ഥാനാര്ഥി.
പക്ഷേ, പിജെ ജോസഫ് മൂക്കു മുറിച്ചു ശകുനം മുടക്കി. കോണ്ഗ്രസ് നേതാക്കളും ഒത്തു കളിച്ചു. അങ്ങനെ ജോസ് ടോമിനു കുറി വീണു.
#പാലായുടെ നഷ്ടം
