ലഖ്നൗ : യു.പി മിര്സാപൂരിലെ സ്കൂള് കുട്ടികള്ക്ക് ഉച്ചഭക്ഷണമായി ചപ്പാത്തിയും ഉപ്പും നല്കിയ വാര്ത്ത പുറത്ത് കൊണ്ടുവന്ന മാധ്യമപ്രവര്ത്തകന് എതിരെ ക്രിമിനല് ഗൂഢാലോചന ചുമത്തി കേസെടുത്തു. ദേശീയ വാര്ത്താ മാധ്യമമായ ദൈനീക് ജാഗ്രനാണ് മാധ്യമപ്രവര്ത്തകനെതിരെ കേസെടുത്ത വാര്ത്ത റിപ്പോര്ട്ട് ചെയ്തത്. ഒരു പ്രാദേശീയ ലേഖകന് എടുത്ത വീഡിയോ ഗ്രാമത്തലവന്റെ പ്രതിനിധിയായ ആള് ഗൂഢാലോചന നടത്തി സ്വന്തമാക്കുകയായിരുന്നു എന്നാണ് എഫ്ഐആറില് പറയുന്നത്.
സ്കൂളിലെ ഉച്ചഭക്ഷണത്തിന്റെ ക്രമീകരണം ഗ്രാമത്തലവന്റെ നിയന്ത്രണത്തിലാണ്. അതുകൊണ്ടു തന്നെ പാകം ചെയ്യാനുള്ള പച്ചക്കറികളിലും മറ്റും കുറവുണ്ടായാല് ആദ്യം ഗ്രാമത്തലവന് അറിയും. ഗ്രാമത്തലവന്റെ പ്രതിനിധിയുടെ ഉത്തരവാദിത്വമാണ് അത് പാചകക്കാരനെ അറിയിക്കുക എന്നത്.
എന്നാല് അത് ചെയ്യാതെ മന:പൂര്വം വീഡിയോ സോഷ്യല് മീഡിയയില് പ്രചരിപ്പിക്കുകയായിരുന്നുവെന്നും എഫ്ഐആറില് പറയുന്നു. മാധ്യമപ്രവര്ത്തകന് പവന് ജെയ്സ്വാല്, ഗ്രാമത്തലവന്റെ പ്രതിനിധിയായ രാജ്കുമാര് ഒപ്പം ഇവര്ക്ക് സഹായം ചെയ്തു കൊടുത്ത മറ്റൊരാള് എന്നിവര്ക്കെതിരെയാണ് ക്രിമിനല് ഗൂഢാലോചന പ്രകാരം കേസ് എടുത്തത്. 120 ബി, 186 (പൊതുസേവനം തടസപ്പെടുത്തല്), 193 (തെറ്റായ രേഖകള് ഉണ്ടാക്കല്), 420 (ചതി), എന്നീ വകുപ്പുകളാണ് ചുമത്തിയിരുന്നത്. മിര്സാപൂരിലെ സിയൂര് പ്രൈമറി സ്കൂളിലെ നൂറോളം വരുന്ന കുട്ടികള് ഉച്ചയ്ക്ക് ചപ്പാത്തിയും ഉപ്പും കഴിക്കുന്ന വീഡിയോ കഴിഞ്ഞ ആഗസ്റ്റ് 23 ന് സോഷ്യല് മീഡിയയില് വലിയ വാര്ത്തയായിരുന്നു.
വീഡിയോ ശ്രദ്ധയില് കൊണ്ടുവരണമെന്ന് പറഞ്ഞ് ദേശീയ മനുഷ്യാവകാശ കമ്മിഷന് ഉത്തര്പ്രദേശ് സര്ക്കാരിന് നോട്ടീസ് അയയ്ക്കുകയും ചെയ്തിരുന്നു. ഹിന്ദി പത്രമായ ജന്സന്ദേശ് ടൈംസിലെ മാധ്യമപ്രവര്ത്തകനായ പവന് ജയ്സ്വാള് ആണ് വീഡിയോ എടുത്തത്.
