സിസ്റ്റര് അഭയക്കേസില് 27 വര്ഷങ്ങള്ക്കിപ്പുറം ആരംഭിച്ച വിചാരണയില് സാക്ഷികളില് ഒരാളായ സിസ്റ്റര് അനുപമ കൂറുമാറിയതിന് പിന്നാലെ പ്രതികള്ക്കെതിരെ ആരോപണം ശക്തമാക്കി സാക്ഷിമൊഴി. കളര്കോഡ് വേണുഗോപാലന് നായരാണ് കേസിലെ പ്രതികളായ ഫാ.തോമസ് കോട്ടൂര്, ഫാ. ജോസ് പൂതൃക്കയില് എന്നിവര്ക്ക് എതിരെ മൊഴി നല്കിയത്.
കേസിലെ നിര്ണായകമായ നുണപരിശോധന റിപ്പോര്ട്ടിനെ ചോദ്യം ചെയ്ത് ഹൈക്കോടതിയെ സമീപിക്കാന് പണം വാഗ്ദാനം ചെയ്തുവെന്നും കേസ് സഭയ്ക്ക് മാനക്കേട് ഉണ്ടാക്കിയെന്നുമാണ് സാക്ഷിമൊഴി. തോമസ് കോട്ടൂര്, സിസ്റ്റര് സ്റ്റെഫി, ഫാ.ജോസ് പൂതൃക്കയില് എന്നിവരെ അറസ്റ്റു ചെയ്യുന്നതിന് ആറുമാസം മുന്പാണ് തന്നെ കോട്ടയം ബിഷപ്പ് ഹൗസിലേയ്ക്ക് വിളിച്ച് വരുത്തിയതെന്നും ഏഴാം സാക്ഷിയായ വേണുഗോപാലന് നായര് പറയുന്നു. ഒരു കോടി രൂപയാണ് ഇതിനായി വാഗ്ദാനം ചെയ്തതെന്നും അദ്ദേഹം കോടതിയില് ബോധിപ്പിച്ചു. പൊതുപ്രവര്ത്തകന് എന്ന നിലയില് കോടതിയെ സമീപിക്കണം എന്നായിരുന്നു ആവശ്യം. എന്നാല്, കോടതിയെ സമീപിച്ചില്ലെന്നും സാക്ഷി മൊഴി വ്യക്തമാക്കുന്നു.
