സല്മാന്ഖാനോടൊപ്പം വീര് എന്ന ചിത്രത്തിലഭിനയിച്ചു കൊണ്ടാണ് നടി സരീന്ഖാന് ബോളിവുഡില് അരങ്ങേറ്റം കുറിച്ചത്. തുടര്ന്ന് ഹൗസ്ഫുള്2, ഹേറ്റ് സ്റ്റോറി 3, 1921 എന്നീ ചിത്രങ്ങളില് താരം അഭിനയിച്ചു. ഇപ്പോള് സ്ട്രെച്ച്മാര്ക്കുകള് പുറത്തു കാണുന്ന തരത്തിലുള്ള വസ്ത്രം ധരിച്ചെടുത്ത ചിത്രത്തിന്റെ പേരിലാണ് സരീന്ഖാന് വിമര്ശിക്കപ്പെടുന്നത്.
ചിത്രം വിമര്ശിക്കപ്പെട്ടതോടെ തന്റെ ശരീരം എന്തുകൊണ്ടാണ് ഇങ്ങനെയെന്നതിനെ കുറിച്ച് വ്യക്തമായ മറുപടിയും സരീന്ഖാന് നല്കി. '' എന്റെ വയറിന് എന്താണ് സംഭവിച്ചതെന്ന് ആകാംക്ഷയുള്ളവരോട്, 50 കിലോയോളം ശരീരഭാരം കുറച്ചയാളുടെ വയര് ഇങ്ങനെയാണിരിക്കുക. ശസ്ത്രക്രിയ ചെയ്തു നേരെയാക്കാത്ത, ഫൊട്ടോഷോപ്പ് ചെയ്യാത്ത വളരെ സ്വാഭാവികമായ ഒരു ചിത്രമാണിത്. യാഥാര്ഥ്യത്തില് വിശ്വസിക്കുന്ന ഒരാളെന്ന നിലയില് ശരീരത്തിന്റെ ഈ അവസ്ഥയെ മറച്ചുവയ്ക്കാതെ അഭിമാനത്തോടെ തുറന്നു കാട്ടുകയാണ് ചെയ്തത്.
പഠിച്ചുകൊണ്ടിരുന്ന സമയത്തൊക്കെ തന്റെ ശരീരഭാരം 100 കിലോ ആയിരുന്നുവെന്നും. അന്നൊക്കെ ആളുകള് പരിഹസിക്കുമ്പോള് തന്നെ അതൊന്നും ബാധിച്ചിരുന്നില്ല. പരിഹാസങ്ങള് അന്നും ഇന്നും എന്നെ ബാധിക്കാറില്ല. എന്നും ധൈര്യമുള്ള ഒരു മനസ്സിന്റെ ഉടമയായിരുന്നു ഞാന്. എന്റെ മനസ്സിലെ തോന്നലുകള് മറച്ചു വയ്ക്കാന് ഞാനൊരിക്കലും ശ്രമിച്ചിട്ടില്ല. എന്റെ ജീവിത യാത്രയില് എന്നെ പിന്തുണച്ച എല്ലാവരോടും ഞാന് എന്നും നന്ദിയുള്ളവളായിരിക്കും. അങ്ങനെയല്ലാത്തവര് എന്നെ കൂടുതല് ശക്തയാക്കിയിട്ടേയുള്ളൂ.'' - സരീന്ഖാന് പറഞ്ഞു.
എന്നാല് ആരാധകരില് പലരും വിമര്ശനങ്ങള് ഉയര്ത്തിയപ്പോള് ബോളിവുഡിലെ പല താരങ്ങളും സരീന്ഖാന് പിന്തുണയുമായാണ് എത്തിയത്.
''സരീന്, നീ ആയിരിക്കുന്ന അവസ്ഥയില് നീ സുന്ദരിയാണ്, ധൈര്യശാലിയാണ്, ശക്തിശാലിയും പെര്ഫെക്റ്റുമാണ്''.- അനുഷ്ക ശര്മ്മ കുറിച്ചു. അനുഷ്കയുടെ സ്നേഹത്തിനും പിന്തുണയ്ക്കും സരീന് നന്ദി പറഞ്ഞു.
